മൂന്നാറിൽ സ്കൈ ഡൈനിങിൽ വിനോദസഞ്ചാരികൾ കുടുങ്ങി; ഒന്നരമണിക്കൂറിലേറെയായിട്ടും രക്ഷിക്കാനായില്ല

ഇടുക്കി: മൂന്നാറിന് സമീപം ആനച്ചാലിലെ സ്വകാര്യ സ്കൈ ഡൈനിങ് സ്ഥാപനത്തിൽ വിനോദസഞ്ചാരികൾ കുടുങ്ങി. ക്രെയിനിൻ്റെ സാങ്കേതിക തകരാർ കാരണം ഒന്നരമണിക്കൂറിലധികമായി സഞ്ചാരികളും ജീവനക്കാരും 120 അടി ഉയരത്തിൽ കുടുങ്ങിക്കിടക്കുകയാണ്. സ്കൈ ഡൈനിങ്ങിൽ ആകെ അഞ്ചുപേരാണ് കുടുങ്ങിയതെന്നാണ് അധികൃതർ നൽകുന്ന ഔദ്യോഗിക വിശദീകരണം. കണ്ണൂരിൽ നിന്നുള്ള ഒരു കുടുംബത്തിലെ ഭാര്യ, ഭർത്താവ്, രണ്ട് കുട്ടികൾ എന്നിവരും ഒരു ജീവനക്കാരനും ഇതിൽ ഉൾപ്പെടുന്നു.

എന്നാൽ, ഇതിലും കൂടുതൽ ആളുകൾ കുടുങ്ങിയിട്ടുണ്ടെന്ന് പ്രദേശത്തുള്ളവർ പറയുന്നു. അഡ്വഞ്ചർ ടൂറിസത്തിൻ്റെ ഭാഗമായി അടുത്തിടെ തുടങ്ങിയ ഈ പദ്ധതിയിൽ ക്രെയിൻ ഉപയോഗിച്ചാണ് ഭക്ഷണ കൗണ്ടർ 120 അടി ഉയരത്തിലേക്ക് ഉയർത്തുന്നത്. എന്നാൽ, ക്രെയിനിൻ്റെ സാങ്കേതിക തകരാർ കാരണം പ്ലാറ്റ്‌ഫോം താഴെയിറക്കാൻ സാധിക്കാത്തതാണ് നിലവിലെ പ്രശ്നം. അരമണിക്കൂറിലേറെ സമയമാണ് ഇവിടെ ആകാശക്കാഴ്ച ആസ്വദിക്കാനായി അനുവദിക്കുക.

കുടുങ്ങിക്കിടക്കുന്നവരെ വടം ഉപയോഗിച്ച് പുറത്തെത്തിക്കാനുള്ള ശ്രമങ്ങളാണ് പ്രാഥമികമായി നടക്കുന്നത്. അടിമാലിയിൽ നിന്നും മൂന്നാറിൽ നിന്നും ഫയർഫോഴ്‌സ് സംഘം രക്ഷാദൗത്യത്തിനായി സംഭവസ്ഥലത്തേക്ക് പുറപ്പെട്ടിട്ടുണ്ട്. റോപ്പും സീറ്റ് ബെൽറ്റും ഉൾപ്പെടെയുള്ള സുരക്ഷാ സൗകര്യങ്ങൾ യാത്രക്കാർക്ക് ലഭ്യമായതിനാൽ അപകടത്തിനുള്ള സാധ്യതയില്ലെന്നാണ് അധികൃതർ അറിയിക്കുന്നത്. എന്നിരുന്നാലും, കഴിഞ്ഞ ഒന്നരമണിക്കൂറിലധികമായി സഞ്ചാരികൾ ഉയരത്തിൽ കുടുങ്ങിക്കിടക്കുകയാണ്.