ചൂട് സഹിക്കാതെ മുറ്റത്ത് കിടന്നതിന് ഭാര്യയ്ക്കും മകൾക്കും ക്രൂരമർദനം; അമ്പലപ്പുഴ സ്വദേശിക്കെതിരെ പോലീസ് കേസ്

അമ്പലപ്പുഴ: കഠിനമായ ചൂട് സഹിക്കാനാവാതെ വീടിന് പുറത്തിറങ്ങി കിടന്നതിന് ഭാര്യയെയും പ്രായപൂർത്തിയാകാത്ത മകളെയും ക്രൂരമായി മർദിച്ച സംഭവത്തിൽ വീട്ടുടമസ്ഥനെതിരെ പോലീസ് കേസെടുത്തു. അമ്പലപ്പുഴ പുതുവൽ സ്വദേശി സിബിമോനെതിരെയാണ് അമ്പലപ്പുഴ പോലീസ് കേസെടുത്തത്.

ഏപ്രിൽ 15-ന് രാത്രി 10:30-നും 11-നും ഇടയിലാണ് ഈ സംഭവം നടന്നത്. മർദനമേറ്റ ഭാര്യ നിഷാമോൾ (39), 16 വയസ്സുകാരിയായ മകൾ നന്ദ എന്നിവർ ചികിത്സ തേടിയിട്ടുണ്ട്. കഠിനമായ ചൂട് കാരണം മുറിക്കുള്ളിൽ ഇരിക്കാൻ കഴിയാതെ വന്നതോടെ നിഷാമോളും മകളും മുറ്റത്ത് തുണി വിരിച്ച് കിടക്കാൻ തീരുമാനിച്ചു. ഇതിൽ പ്രകോപിതനായ സിബിമോൻ, "ആരെ കാണിക്കാനാണ് ഇവിടെ തുണി വിരിക്കുന്നത്" എന്ന് ആക്രോശിച്ചുകൊണ്ട് മർദിക്കുകയായിരുന്നു.

നിഷാമോളുടെ നടുവിന് ചവിട്ടുകയും മുടിയിൽ പിടിച്ചു വലിച്ച് മുഖത്ത് ക്രൂരമായി അടിക്കുകയും ചെയ്തു. അമ്മയെ രക്ഷിക്കാൻ ഓടിയെത്തിയ മകൾ നന്ദയെയും പ്രതി അസഭ്യം പറയുകയും പലതവണ മർദിക്കുകയും ചെയ്തു. ഭാര്യ നൽകിയ പരാതിയുടെ അടിസ്ഥാനത്തിൽ ഭാരതീയ ന്യായ സംഹിതയിലെ (BNS) വിവിധ വകുപ്പുകൾ പ്രകാരവും മകളെ മർദിച്ചതിന് ജുവനൈൽ ജസ്റ്റിസ് ആക്റ്റിലെ സെക്ഷൻ 75 പ്രകാരവുമാണ് കേസ് എടുത്തിരിക്കുന്നത്. അമ്പലപ്പുഴ പോലീസ് സ്റ്റേഷനിലെ ഗ്രേഡ് എസ്ഐ നവാസ് എച്ചിനാണ് കേസിന്റെ അന്വേഷണ ചുമതല. പ്രതിക്കെതിരെ കർശന നടപടി സ്വീകരിക്കുമെന്ന് പോലീസ് അറിയിച്ചു.