അമേരിക്കന്‍ സൈന്യത്തിന്റെ ഹൃദയഭാഗത്തേക്ക് 'ജെമിനൈ';പെന്റഗണുമായി കരാറിനൊരുങ്ങി ഗൂഗിള്‍

അമേരിക്കൻ പ്രതിരോധ വകുപ്പായ പെന്റഗണിലേക്ക് തങ്ങളുടെ ഏറ്റവും കരുത്തുറ്റ ആർട്ടിഫിഷ്യൽ ഇന്റലിജൻസ് മോഡലായ 'ജെമിനൈ' എത്തിക്കാൻ ഗൂഗിൾ ചർച്ചകൾ നടത്തുന്നതായി റിപ്പോർട്ട്. സൈന്യത്തിന്റെ ഭരണപരമായ ജോലികൾ വേഗത്തിലാക്കാനും രഹസ്യ വിവരങ്ങൾ കൈകാര്യം ചെയ്യാനുമാണ് ഈ നീക്കം. എന്നാൽ സാങ്കേതികവിദ്യയുടെ ദുരുപയോഗം തടയാൻ കർശനമായ നിബന്ധനകളാണ് ഗൂഗിൾ മുന്നോട്ടുവെച്ചിരിക്കുന്നത്.

ആളുകളെ നിരീക്ഷിക്കാനോ മനുഷ്യന്റെ ഇടപെടലില്ലാതെ ആക്രമണം നടത്തുന്ന സ്വയംനിയന്ത്രിത ആയുധങ്ങളിലോ ജെമിനൈ ഉപയോഗിക്കരുത് എന്നതാണ് ഗൂഗിളിന്റെ പ്രധാന വ്യവസ്ഥ. മുൻപ് 'പ്രോജക്റ്റ് മാവെൻ' എന്ന സൈനിക പദ്ധതിയിൽ നിന്ന് ജീവനക്കാരുടെ പ്രതിഷേധത്തെത്തുടർന്ന് ഗൂഗിൾ പിന്മാറിയിരുന്നു. സമാനമായ നിബന്ധനകൾ വെച്ച ആന്ത്രോപ്പിക്കും പെന്റഗണും തമ്മിലുള്ള ബന്ധം വഷളായ പശ്ചാത്തലത്തിൽ, ഗൂഗിളിന്റെ ഈ നിലപാട് ആഗോളതലത്തിൽ വലിയ ചർച്ചകൾക്ക് വഴിവെച്ചിട്ടുണ്ട്. ക്ലൗഡ് കംപ്യൂട്ടിങ് രംഗത്ത് മൈക്രോസോഫ്റ്റിനോടും ആമസോണിനോടും മത്സരിക്കുന്ന ഗൂഗിളിന് ഈ കരാർ വലിയ ബിസിനസ് സാധ്യതയാണ് തുറന്നുനൽകുന്നത്.