അഞ്ചലിൽ കരാട്ടെ പരിശീലനത്തിനിടെ കുഴഞ്ഞുവീണ് വിദ്യാർത്ഥിനി മരിച്ചു

അഞ്ചൽ: കരാട്ടെ പരിശീലനത്തിനിടെ കുഴഞ്ഞുവീണ ആറാം ക്ലാസ് വിദ്യാർത്ഥിനി മരിച്ചു. വാളകം തെക്കേഅമ്പലക്കര പുത്തൻവീട്ടിൽ ബിനോയിയുടെയും സിമിയുട‌െയും മകൾ അഹന്ന ബിനോയ് (11) ആണ് മരിച്ചത്.

അഞ്ചലിലെ കരാട്ടെ പരിശീലന കേന്ദ്രത്തിൽ ഇന്നലെ ഉച്ചകഴിഞ്ഞായിരുന്നു ദാരുണമായ ഈ സംഭവം നടന്നത്. പരിശീലനത്തിനിടെ പെട്ടെന്ന് കുഴഞ്ഞുവീണ അഹന്നയെ ഉടൻ തന്നെ അടുത്തുള്ള സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

മകൾക്ക് കൂട്ടിനായി എത്തിയ മാതാവ് സിമിയും ഈ സമയം പരിശീലന കേന്ദ്രത്തിൽ ഉണ്ടായിരുന്നു. കൺമുന്നിൽ മകൾ തളർന്നുവീണത് കണ്ട് ഓടിയെത്തിയെങ്കിലും മരണം അപ്പോഴേക്കും സംഭവിച്ചിരുന്നു.
വാളകം കോംപസ് ഗ്ലോബൽ സ്കൂളിലെ ആറാം ക്ലാസ് വിദ്യാർത്ഥിനിയാണ് അഹന്ന. കുട്ടിയുടെ അപ്രതീക്ഷിത വേർപാടിൽ അധ്യാപകരും സഹപാഠികളും വലിയ നടുക്കത്തിലാണ്.