ടാറ്റ സിയറ ഇവി ഉടൻ വിപണിയിലേക്ക്; ഏപ്രിൽ-ജൂൺ പാദത്തിൽ പുറത്തിറക്കുമെന്ന് സ്ഥിരീകരണം

മുംബൈ: ഐതിഹാസിക ബ്രാൻഡായ സിയറയെ ഇലക്ട്രിക് രൂപത്തിൽ വീണ്ടും വിപണിയിലെത്തിക്കാൻ ഒരുങ്ങി ടാറ്റ മോട്ടോഴ്‌സ്. 2026-ലെ ഏപ്രിൽ-ജൂൺ മാസങ്ങൾക്കിടയിൽ സിയറ ഇവി ഇന്ത്യയിൽ പുറത്തിറക്കുമെന്ന് കമ്പനി ഔദ്യോഗികമായി സ്ഥിരീകരിച്ചു. ആദ്യമായാണ് ഈ വാഹനത്തിന്റെ ലോഞ്ച് കാലയളവ് കമ്പനി വെളിപ്പെടുത്തുന്നത്.

സിയറ ഇവിയുടെ കൃത്യമായ വിവരങ്ങൾ പുറത്തുവിട്ടിട്ടില്ലെങ്കിലും, ടാറ്റയുടെ തന്നെ കര്‍വ് ഇവിക്ക് മുകളിലായിരിക്കും ഈ മോഡലിന്റെ സ്ഥാനം. കര്‍വ് ഇവിക്ക് സമാനമായ ഫീച്ചറുകളും പവർട്രെയിനുകളും സിയറയിലും പ്രതീക്ഷിക്കുന്നുണ്ട്. പുതുക്കിയ ബാറ്ററി സാങ്കേതികവിദ്യയുമായി എത്തിയ പഞ്ച് ഇവിക്ക് സമാനമായി, സിയറയിലും വലിയ ബാറ്ററി പാക്കും മെച്ചപ്പെട്ട റേഞ്ചും ഉണ്ടാകാനാണ് സാധ്യത.

സിയറ കൂടി എത്തുന്നതോടെ ടാറ്റയുടെ ഇന്ത്യൻ നിരയിലെ ഇലക്ട്രിക് വാഹനങ്ങളുടെ എണ്ണം ഏഴായി ഉയരും. ഇത് ഇലക്ട്രിക് വാഹന വിപണിയിൽ ടാറ്റയുടെ ആധിപത്യം വർദ്ധിപ്പിക്കും. മിഡ്-സൈസ് ഇലക്ട്രിക് എസ്‌യുവി വിഭാഗത്തിൽ സിയറ ഇവി ഒരു വലിയ തരംഗം സൃഷ്ടിക്കുമെന്നാണ് വാഹന പ്രേമികളുടെയും വിപണി വിദഗ്ധരുടെയും വിലയിരുത്തൽ.