ഇന്ത്യയിൽ കാവസാക്കി Z1100 പുറത്തിറക്കി: വില 12.79 ലക്ഷം രൂപ

 പ്രമുഖ ജാപ്പനീസ് ടൂ-വീലർ ബ്രാൻഡായ കാവസാക്കി, തങ്ങളുടെ പുതിയ സൂപ്പർനേക്കഡ് മോട്ടോർസൈക്കിളായ ഇസെഡ് 1100 (Z1100) ഇന്ത്യൻ വിപണിയിൽ അവതരിപ്പിച്ചു. ഈ പുതിയ മോഡലിന്റെ എക്‌സ്-ഷോറൂം വില 12.79 ലക്ഷം രൂപയാണ്.

വളരെക്കാലമായി നിർത്തിവെച്ച Z1000 മോഡലിന് പകരമായാണ് Z1100 എത്തുന്നത്. ബ്രാൻഡിന്റെ ട്രേഡ്മാർക്ക് ഡിസൈൻ ഫിലോസഫിയായ 'സുഗോമി' (Sugomi) നിലനിർത്തിക്കൊണ്ടാണ് ഈ മോഡലിനെ കമ്പനി വികസിപ്പിച്ചിരിക്കുന്നത്.

നിൻജ 1100 SX-ൽ നിന്ന് കടമെടുത്ത, 1,099 സിസി, ലിക്വിഡ്-കൂൾഡ്, ഇൻലൈൻ-ഫോർ എൻജിനാണ് Z1100-ന് കരുത്ത് പകരുന്നത്. ഈ എൻജിൻ 9,000 rpm-ൽ 136 bhp കരുത്തും 7,600 rpm-ൽ 113 Nm ടോർക്കും ഉത്പാദിപ്പിക്കുന്നു. ആറ് സ്പീഡ് ഗിയർബോക്സാണ് വാഹനത്തിലുള്ളത്.

രണ്ട് ദിശകളിലേക്കും (ക്ലച്ച് ഉപയോഗിക്കാതെ) ഗിയർ മാറ്റാൻ സഹായിക്കുന്ന കാവസാക്കിയുടെ ക്വിക്ക് ഷിഫ്റ്റർ സിസ്റ്റം ഇതിൽ ഉൾപ്പെടുത്തിയിട്ടുണ്ട്. മികച്ച എഞ്ചിൻ ശേഷി, നൂതന സാങ്കേതികവിദ്യ, ആധുനിക മെക്കാനിക്കലുകൾ എന്നിവ സംയോജിപ്പിച്ചാണ് Z1100 വിപണിയിലെത്തുന്നത്.