പ്രമേഹരോഗികൾക്ക് മധുരം പൂർണ്ണമായും ഒഴിവാക്കണോ? മിതത്വം പ്രധാനം

പ്രമേഹരോഗികൾ മധുരം പൂർണമായും ഉപേക്ഷിക്കണോ എന്ന കാര്യത്തിൽ പലരിലും ആശയക്കുഴപ്പമുണ്ട്. എന്നാൽ മധുരത്തെ ജീവിതത്തിൽ നിന്ന് പൂർണ്ണമായും മാറ്റിനിർത്തണമെന്നത് ഒരു തെറ്റായ ധാരണയാണെന്നും, മിതത്വം പാലിച്ചുകൊണ്ട് പ്രമേഹരോഗികൾക്കും മധുരം ആസ്വദിക്കാമെന്നും ആരോഗ്യ വിദഗ്ധർ ചൂണ്ടിക്കാട്ടുന്നു.

രക്തത്തിലെ പഞ്ചസാരയുടെ അളവ് നിയന്ത്രണവിധേയമാണെങ്കിൽ വല്ലപ്പോഴും അല്പം മധുരം കഴിക്കുന്നത് ആരോഗ്യത്തിന് വലിയ ദോഷം ചെയ്യില്ല. എന്നാൽ ഇത് കഴിക്കുന്ന രീതിയിലും അളവിലും കൃത്യമായ ശ്രദ്ധ വേണം.

മധുരം കഴിക്കുമ്പോൾ ശ്രദ്ധിക്കേണ്ട കാര്യങ്ങൾ:

പഞ്ചസാര രക്തത്തിലെ ഗ്ലൂക്കോസ് പെട്ടെന്ന് വർദ്ധിപ്പിക്കും. അതിനാൽ കാർബോഹൈഡ്രേറ്റ് കൂടിയ ഭക്ഷണത്തോടൊപ്പം മധുരം കഴിക്കുന്നത് ഒഴിവാക്കണം. പകരം നാരുകൾ, പ്രോട്ടീൻ, ആരോഗ്യകരമായ കൊഴുപ്പ് എന്നിവ അടങ്ങിയ ഭക്ഷണത്തോടൊപ്പം മധുരം ഉൾപ്പെടുത്തുന്നത് പഞ്ചസാരയുടെ ആഗിരണം സാവധാനത്തിലാക്കാൻ സഹായിക്കും.

ദിവസേന കഴിക്കുന്ന ആകെ കലോറിയുടെ പത്തു ശതമാനത്തിൽ താഴെ മാത്രമേ അധികമായി ചേർത്ത പഞ്ചസാര (Added Sugar) പാടുള്ളൂ എന്നാണ് അമേരിക്കൻ ഡയബറ്റീസ് അസോസിയേഷൻ നിർദ്ദേശിക്കുന്നത്.

മധുരം കഴിച്ച ശേഷം ശരീരം എങ്ങനെ പ്രതികരിക്കുന്നു എന്ന് ഗ്ലൂക്കോമീറ്റർ ഉപയോഗിച്ച് പരിശോധിക്കുന്നത് നല്ലതാണ്. ഓരോ വ്യക്തിയുടെയും ശരീരം വ്യത്യസ്തമായ രീതിയിലാകാം ഭക്ഷണത്തോട് പ്രതികരിക്കുക.

പാക്കറ്റുകളിൽ ലഭിക്കുന്ന മധുരപലഹാരങ്ങൾക്ക് പകരം വീട്ടിൽ തയ്യാറാക്കുന്ന പരമ്പരാഗത വിഭവങ്ങൾ തിരഞ്ഞെടുക്കുക. ഇവയിൽ പ്രിസർവേറ്റീവുകളും അമിതമായ പഞ്ചസാരയും കുറവായിരിക്കും.

സ്ഥിരമായി മധുരം കഴിക്കുന്നത് രക്തത്തിലെ പഞ്ചസാരയുടെ അളവ് വർദ്ധിപ്പിക്കാനും ദീർഘകാല ആരോഗ്യപ്രശ്നങ്ങളുണ്ടാക്കാനും കാരണമാകും. അതിനാൽ കൃത്യമായ ഇടവേളകളിൽ രക്തപരിശോധന നടത്തുകയും ഭക്ഷണത്തിന്റെ അളവിൽ നിയന്ത്രണം ഏർപ്പെടുത്തുകയും ചെയ്യുക എന്നതാണ് പ്രമേഹരോഗികൾക്ക് ഏറ്റവും സുരക്ഷിതമായ മാർഗ്ഗം.