പാലക്കാട് കോളറ കേസില്ല; മന്ത്രിയുടെ പ്രസ്താവനയ്ക്ക് പിന്നാലെ ആരോഗ്യവകുപ്പിന്റെ വിശദീകരണം

പാലക്കാട്: പാലക്കാട് ജില്ലയിൽ കോളറ സ്ഥിരീകരിച്ചെന്ന ആരോഗ്യവകുപ്പ് മന്ത്രി കെ മുരളീധരന്റെ പ്രസ്താവന തള്ളി ജില്ലാ മെഡിക്കൽ ഓഫീസർ (ഡിഎംഒ) ഡോ. ടി.വി. റോഷ്. ജില്ലയിൽ ഇതുവരെ കോളറ റിപ്പോർട്ട് ചെയ്തിട്ടില്ലെന്ന് ഡിഎംഒ വ്യക്തമാക്കി.

വെള്ളിയാഴ്ച പാലക്കാട് രണ്ട് പേർക്ക് കോളറ സ്ഥിരീകരിച്ചുവെന്നായിരുന്നു മന്ത്രി മാധ്യമങ്ങളോട് പ്രതികരിച്ചത്. എന്നാൽ ഇതിനെ തള്ളിക്കൊണ്ടാണ് ഡിഎംഒ രംഗത്തെത്തിയത്.

ഓങ്ങല്ലൂർ, ലക്കിടി-പേരൂർ സ്വദേശികൾക്ക് കോളറയുണ്ടെന്ന സംശയത്തെ തുടർന്ന് പരിശോധന നടത്തിയിരുന്നുവെന്നും, പരിശോധനാഫലത്തിൽ ഇരുവർക്കും കോളറ ഇല്ലെന്ന് സ്ഥിരീകരിച്ചതായും ഡിഎംഒ അറിയിച്ചു. വാണിയംകുളത്തെ സ്വകാര്യ ആശുപത്രിയിലായിരുന്നു ഇരുവരും ചികിത്സയിൽ കഴിഞ്ഞിരുന്നത്.

ഡിഎംഒയുടെ വിശദീകരണത്തിന് പിന്നാലെ ആരോഗ്യവകുപ്പും തിരുത്തലുമായി രംഗത്തെത്തി. രണ്ട് പേർക്കും കോളറയുടെ ലക്ഷണങ്ങൾ മാത്രമാണ് ഉണ്ടായിരുന്നതെന്നും, മൈക്രോബയോളജി ലാബിൽ നടത്തിയ പരിശോധനയിൽ ഫലം നെഗറ്റീവായിരുന്നുവെന്നും ആരോഗ്യവകുപ്പ് അറിയിച്ചു.