രാജി പ്രഖ്യാപിച്ച് എൻ. ശക്തൻ: തിരുവനന്തപുരം ഡിസിസി അധ്യക്ഷസ്ഥാനം ഒഴിഞ്ഞു; ലക്ഷ്യം നിയമസഭാ മത്സരം

തിരുവനന്തപുരം: തിരുവനന്തപുരം ഡി.സി.സി. (ജില്ലാ കോൺഗ്രസ് കമ്മിറ്റി) അധ്യക്ഷസ്ഥാനം എൻ. ശക്തൻ രാജിവെച്ചു. രാജിക്കത്ത് അദ്ദേഹം കെ.പി.സി.സിക്ക് (കേരള പ്രദേശ് കോൺഗ്രസ് കമ്മിറ്റി) കൈമാറിയിട്ടുണ്ട്. പാലോട് രവി രാജിവെച്ചതിനെ തുടർന്നാണ് എൻ. ശക്തൻ താത്കാലിക ഡി.സി.സി. അധ്യക്ഷനായി ചുമതലയേറ്റത്.

താത്കാലിക അധ്യക്ഷനായി തുടരാൻ താൽപര്യമില്ലെന്ന് ശക്തൻ കെ.പി.സി.സി. നേതൃത്വത്തെ അറിയിച്ചുവെന്നാണ് വിവരം. സ്ഥിരം അധ്യക്ഷസ്ഥാനം വാഗ്ദാനം ചെയ്താലും അദ്ദേഹം അത് സ്വീകരിക്കാൻ സാധ്യതയില്ല. അടുത്ത നിയമസഭാ തിരഞ്ഞെടുപ്പിൽ മത്സരിക്കാനുള്ള ഒരുക്കങ്ങളുടെ ഭാഗമായാണ് എൻ. ശക്തന്റെ രാജിയെന്നാണ് പ്രധാന സൂചന. മത്സരിക്കാനുള്ള താൽപര്യം അദ്ദേഹം നേരത്തെ പ്രകടിപ്പിച്ചിരുന്നു.

ശക്തൻ്റെ രാജിക്കത്ത് കെ.പി.സി.സി. നേതൃത്വം ഇതുവരെ ഔദ്യോഗികമായി സ്വീകരിച്ചിട്ടില്ല. തദ്ദേശ തിരഞ്ഞെടുപ്പ് പൂർത്തിയാകും വരെ താത്കാലിക അധ്യക്ഷനായി തുടരാൻ എൻ. ശക്തനോട് നേതൃത്വം ആവശ്യപ്പെട്ടേക്കുമെന്നാണ് വിവരം. എൻ. ശക്തനുമായി കെ.പി.സി.സി. പ്രസിഡൻ്റ് സണ്ണി ജോസഫ് ഇന്ന് കൂടിക്കാഴ്ച നടത്തുമെന്നാണ് വിവരം.