ഇത്തവണ കാലവർഷം കുറഞ്ഞേക്കാം; 'എൽ നിനോ' ഭീഷണിയെന്ന് കാലാവസ്ഥാ വകുപ്പ്

തിരുവനന്തപുരം: രാജ്യത്ത് ഇത്തവണത്തെ കാലവർഷം സാധാരണ ലഭിക്കുന്നതിനേക്കാൾ കുറയാൻ സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പിന്റെ പ്രാഥമിക പ്രവചനം. പസഫിക് സമുദ്രത്തിലെ താപനിലയിലുണ്ടാകുന്ന മാറ്റങ്ങൾ (എൽ നിനോ) മൺസൂണിനെ സ്വാധീനിച്ചേക്കുമെന്നാണ് റിപ്പോർട്ടുകൾ സൂചിപ്പിക്കുന്നത്.

ജൂൺ മുതൽ സെപ്റ്റംബർ വരെയുള്ള മഴയുടെ അളവിൽ കുറവുണ്ടാകാമെങ്കിലും കേരളമുൾപ്പെടെയുള്ള തെക്കൻ സംസ്ഥാനങ്ങളിൽ മഴ സാധാരണ നിലയിൽ ലഭിക്കുമെന്നാണ് പ്രതീക്ഷിക്കുന്നത്. മൺസൂൺ കാലയളവിൽ പസഫിക് സമുദ്രോപരിതലം ചൂടാകുന്ന എൽ നിനോ പ്രതിഭാസം രൂപപ്പെടാൻ സാധ്യതയുണ്ട്. ഇത് ഇന്ത്യയിലെ കാലവർഷം ദുർബലമാകാൻ കാരണമായേക്കാം. സ്വകാര്യ കാലാവസ്ഥാ ഏജൻസിയായ സ്കൈമെറ്റും സമാനമായ മുന്നറിയിപ്പ് നൽകിയിട്ടുണ്ട്.

മൺസൂണിന്റെ അവസാന ഘട്ടത്തിൽ ഇന്ത്യൻ മഹാസമുദ്രത്തിലെ താപനിലയിലുണ്ടാകുന്ന വ്യതിയാനം മഴയ്ക്ക് അനുകൂലമാകാൻ സാധ്യതയുണ്ട്. ഇത് എൽ നിനോയുടെ ആഘാതം കുറയ്ക്കാൻ സഹായിച്ചേക്കും. കാലവർഷത്തിന്റെ ആദ്യ പകുതിയിൽ സാധാരണ മഴ ലഭിക്കുമെങ്കിലും രണ്ടാം പകുതിയിൽ മഴ കുറയാനുള്ള സാധ്യതയാണ് സ്കൈമെറ്റ് ചൂണ്ടിക്കാട്ടുന്നത്.

രാജ്യത്താകെ മഴ കുറയാൻ സാധ്യതയുണ്ടെങ്കിലും കേരളത്തിൽ ഇത്തവണയും സാധാരണ തോതിലുള്ള മഴ ലഭിക്കുമെന്നാണ് കേന്ദ്ര കാലാവസ്ഥാ വകുപ്പിന്റെ പ്രവചനം. ഇത് കാർഷിക മേഖലയ്ക്കും ഡാമുകളിലെ ജലനിരപ്പ് നിലനിർത്തുന്നതിനും ആശ്വാസകരമാണ്.