പഞ്ചസാരയുടെ അമിത ഉപയോഗം: പ്രമേഹം മാത്രമല്ല, ഭീഷണികൾ വേറെയുമുണ്ട് !

പഞ്ചസാരയുടെ ഉപയോഗം പലപ്പോഴും പ്രമേഹവുമായി (Diabetes) മാത്രമാണ് നാം ബന്ധിപ്പിക്കാറുള്ളത്. എന്നാൽ യഥാർത്ഥത്തിൽ ശരീരത്തിലെ എല്ലാ അവയവങ്ങളെയും ബാധിക്കുന്ന ഒട്ടനവധി ആരോഗ്യ പ്രശ്നങ്ങൾക്ക് പഞ്ചസാര കാരണമാകുന്നുണ്ട്. രക്തസമ്മർദ്ദം, ഫാറ്റി ലിവർ, ശരീരത്തിലെ വീക്കം എന്നിവയ്ക്ക് പഞ്ചസാര കാരണമാകുന്നു. ഇത് ഹൃദ്രോഗ സാധ്യത വർദ്ധിപ്പിക്കുകയും കൊളസ്‌ട്രോൾ നില ഉയർത്തുകയും ചെയ്യുന്നു.

പോഷകഗുണങ്ങൾ ഇല്ലാത്ത പഞ്ചസാര അമിതമായി കഴിക്കുന്നത് വിശപ്പ് വർദ്ധിപ്പിക്കുന്നു. ഇത് അമിതമായി ഭക്ഷണം കഴിക്കാനും അതുവഴി ശരീരഭാരം കൂടാനും കാരണമാകുന്നു. ശരീരത്തിന്റെ ഇൻസുലിനോടുള്ള പ്രതികരണശേഷി കുറയുന്നത് ടൈപ്പ് 2 പ്രമേഹത്തിനും സ്ത്രീകളിൽ പി.സി.ഒ.എസ് (PCOS) പോലുള്ള അവസ്ഥകൾക്കും വഴിതെളിക്കുന്നു.

പഞ്ചസാര ചർമ്മത്തിലെ കൊളാജൻ, എലാസ്റ്റിൻ എന്നീ പ്രോട്ടീനുകളെ നശിപ്പിക്കുന്നു (Glycation). ഇത് ചർമ്മം നേരത്തെ ചുളിയുന്നതിനും തൂങ്ങുന്നതിനും കാരണമാകുന്നു. ശരീരത്തിലെ വീക്കം വർദ്ധിപ്പിക്കുന്നതിലൂടെ ബാക്ടീരിയ, വൈറസ്, ഫംഗസ് അണുബാധകളെ ചെറുക്കാനുള്ള കഴിവിനെ പഞ്ചസാര ദുർബലപ്പെടുത്തുന്നു.
പഞ്ചസാരയുടെ ഉപയോഗം പരിമിതപ്പെടുത്തുന്നത് രക്തസമ്മർദ്ദം നിയന്ത്രിക്കാനും യുവത്വം നിലനിർത്താനും രോഗപ്രതിരോധ ശേഷി വർദ്ധിപ്പിക്കാനും സഹായിക്കും.