വൻ പനി പടരുന്നുവെന്ന റിപ്പോർട്ടുകൾ നിരസിച്ച് ചൈന; വിദേശികൾക്ക് രാജ്യം സുരക്ഷിതമെന്നും ചൈന

ബീജിംഗ്: രാജ്യത്തെ ആശുപത്രികളിൽ വൻതോതിൽ പനി പടർന്നുപിടിച്ചെന്ന റിപ്പോർട്ടുകൾ തള്ളിക്കളഞ്ഞു ചൈന. മറിച്ചു ശൈത്യകാലത്ത് ഉണ്ടാകുന്ന ശ്വാസകോശ സംബന്ധമായ അസുഖങ്ങളുടെ കേസുകൾ കഴിഞ്ഞ വർഷത്തെ അപേക്ഷിച്ച് ഈ വർഷം കുറവാണെന്നും ചൈന പറഞ്ഞു.

വിദേശികൾക്ക് ചൈനയിലേക്കുള്ള യാത്ര സുരക്ഷിതമാണെന്ന് വിദേശകാര്യ മന്ത്രാലയം അറിയിച്ചു.

“വടക്കൻ അർദ്ധഗോളത്തിൽ ശൈത്യകാലത്ത് ശ്വാസകോശ സംബന്ധമായ അണുബാധകൾ കൂടുതലായിരിക്കും,” ചൈനയിൽ ഇൻഫ്ലുവൻസ എയും മറ്റ് ശ്വാസകോശ സംബന്ധമായ അസുഖങ്ങളും പടരുന്നതിനെക്കുറിച്ചുള്ള ചോദ്യത്തിന് മറുപടിയായി ചൈനീസ് വിദേശകാര്യ മന്ത്രാലയ വക്താവ് മാവോ നിംഗ് മാധ്യമങ്ങളോട് പറഞ്ഞു.

സോഷ്യൽ മീഡിയയിൽ പ്രചരിക്കുന്ന വീഡിയോകളിൽ ചൈനയിലെ തിരക്കേറിയ ആശുപത്രികളുടെ നില  കണ്ട് ഭീതി പടരുന്നുണ്ട്.

രോഗങ്ങളുടെ തീവ്രത കുറവാണെന്നും മുൻവർഷത്തെ അപേക്ഷിച്ച് ചെറിയ തോതിലാണ് പടരുന്നതെന്നും അവർ പറഞ്ഞു.

"ചൈനയിലെ ചൈനീസ് പൗരന്മാരുടെയും വിദേശികളുടെയും ആരോഗ്യത്തെക്കുറിച്ച് ചൈനീസ് സർക്കാർ ശ്രദ്ധിക്കുന്നുവെന്ന് എനിക്ക് ഉറപ്പ് നൽകാൻ കഴിയും. ചൈനയിൽ യാത്ര ചെയ്യുന്നത് സുരക്ഷിതമാണ്," അവർ പറഞ്ഞു.

ശൈത്യകാലത്തെ ശ്വാസകോശ രോഗങ്ങൾ തടയുന്നതിനും നിയന്ത്രിക്കുന്നതിനുമായി ചൈനയിലെ നാഷണൽ ഡിസീസ് കൺട്രോൾ ആൻഡ് പ്രിവൻഷൻ അഡ്മിനിസ്ട്രേഷൻ പുറപ്പെടുവിച്ച മാർഗ്ഗനിർദ്ദേശങ്ങളും അവർ പരാമർശിച്ചു.

കഴിഞ്ഞ കുറച്ച് ദിവസങ്ങളായി ചൈനയിൽ വൻ പനി പടരുന്നു എന്ന റിപ്പോർട്ടുകൾ വിദേശത്ത്, പ്രത്യേകിച്ച് ഇന്ത്യയിലും ഇന്തോനേഷ്യയിലും പ്രചരിക്കുന്നുണ്ട്.

എന്നിരുന്നാലും, പകർച്ചവ്യാധികൾ ശൈത്യകാലത്ത് ചൈനയിൽ ഒരു സാധാരണ സംഭവമാണെന്നാണ്  ആരോഗ്യ ഉദ്യോഗസ്ഥർ പറയുന്നത്. കഴിഞ്ഞ കുറച്ച് മാസങ്ങളായി കടുത്ത തണുപ്പാണ് ചൈനയിൽ അനുഭവപ്പെടുന്നത്.