ധവളപത്ര ചർച്ചകൾക്കിടയിൽ നിയമസഭയിൽ 'ചേര' പൂരം! സഭാ ടിവിയുടെ ബാഗിന് പിന്നിൽ ഒളിച്ചിരുന്ന പാമ്പിനെ ചാക്കിലാക്കി ഫയർഫോഴ്സ്!

തിരുവനന്തപുരം: സംസ്ഥാനത്തിന്റെ സാമ്പത്തിക സ്ഥിതി വ്യക്തമാക്കുന്ന ധവളപത്രത്തെച്ചൊല്ലി നിയമസഭയ്ക്കുള്ളിൽ കടുത്ത രാഷ്ട്രീയ ചർച്ചകളും തർക്കങ്ങളും കൊഴുക്കുന്നതിനിടെ, സഭാമന്ദിരത്തിൽ അപ്രതീക്ഷിതമായി 'ചേര' അതിഥിയായെത്തി. നിയമസഭാ മന്ദിരത്തിന്റെ രണ്ടാം നിലയിൽ പ്രവർത്തിക്കുന്ന സഭാ ടിവിയുടെ (Sabha TV) മുറിയിലാണ് വൈകുന്നേരത്തോടെ ചേരയെ കണ്ടെത്തിയത്. തുടർന്ന് ഫയർഫോഴ്സ് ഉദ്യോഗസ്ഥരെത്തി പാമ്പിനെ സുരക്ഷിതമായി പിടികൂടുകയായിരുന്നു.

സഭാ ടിവിയുടെ വിവിധ ഉപകരണങ്ങളും മറ്റും സൂക്ഷിച്ചിരുന്ന സ്ഥലത്തുണ്ടായിരുന്ന ഒരു ബാഗിന് പിന്നിലാണ് ജീവനക്കാർ ആദ്യം ചേരയെ കണ്ടത്. പാമ്പിനെ കണ്ട് ജീവനക്കാർ പരിഭ്രാന്തരായതോടെ, ഉടൻ തന്നെ വനംവകുപ്പിന്റെ ഔദ്യോഗിക 'സർപ്പ' (SARPA) ആപ്പ് വഴി ഫയർഫോഴ്സിനെ വിവരമറിയിക്കുകയായിരുന്നു. വിവരമറിഞ്ഞ് തിരുവനന്തപുരം യൂണിറ്റിൽ നിന്നും പാമ്പുപിടുത്തത്തിൽ പ്രത്യേക പരിശീലനം ലഭിച്ച ഫയർഫോഴ്സ് ഉദ്യോഗസ്ഥരുടെ സംഘം നിമിഷനേരം കൊണ്ട് നിയമസഭയിലെത്തി.

ഉദ്യോഗസ്ഥർ പിടികൂടാൻ ശ്രമിക്കുന്നതിനിടെ സമീപത്തുണ്ടായിരുന്ന അലമാരയ്ക്കുള്ളിലേക്ക് കയറി രക്ഷപ്പെടാൻ ചേര ശ്രമിച്ചെങ്കിലും നടന്നില്ല. ഫയർഫോഴ്സ് സംഘം തന്ത്രപരമായി ചേരയെ കുടുക്കുകയും അവർ കൊണ്ടുവന്ന ചാക്കിലാക്കി പുറത്തേക്ക് കൊണ്ടുപോവുകയുമായിരുന്നു. നേരത്തെ സംസ്ഥാന സെക്രട്ടേറിയറ്റ് മന്ദിരത്തിലും സമാനമായ രീതിയിൽ പലതവണ ചേരയെ പിടികൂടിയിട്ടുണ്ട്. ധവളപത്ര ചർച്ചകൾക്കിടയിൽ നിയമസഭയിലുണ്ടായ ഈ പാമ്പ് പിടുത്തം സഭാമന്ദിരത്തിൽ അൽപ്പസമയം കൗതുകവും പരപ്പരപ്പുമുണ്ടാക്കി.