ആറന്മുളയിൽ ഇഞ്ചോടിഞ്ച് പോരാട്ടം: വിജയപ്രതീക്ഷയിൽ എൽഡിഎഫും യുഡിഎഫും

പത്തനംതിട്ട ജില്ലയിലെ ആറന്മുള മണ്ഡലത്തിൽ വോട്ടെണ്ണലിന് തൊട്ടുമുൻപുള്ള കണക്കുകളിൽ വലിയ വിജയപ്രതീക്ഷയുമായി മുന്നണികൾ. മണ്ഡലത്തിൽ നടപ്പിലാക്കിയ വികസനപ്രവർത്തനങ്ങൾ മുൻനിർത്തി എൽഡിഎഫ് സ്ഥാനാർത്ഥി വീണാ ജോർജ് എണ്ണായിരത്തോളം വോട്ടുകളുടെ ഭൂരിപക്ഷത്തിൽ ഹാട്രിക് വിജയം നേടുമെന്നാണ് ഇടത് ക്യാമ്പിന്റെ വിലയിരുത്തൽ. 2016-ൽ 7,646 വോട്ടുകളുടെ ഭൂരിപക്ഷത്തിൽ തുടങ്ങിയ വീണ, കഴിഞ്ഞ തവണ അത് 19,003 ആയി ഉയർത്തിയിരുന്നു. എന്നാൽ ഇത്തവണ പതിനായിരം വോട്ടുകളുടെ ഭൂരിപക്ഷത്തിൽ അബിൻ വർക്കിയിലൂടെ മണ്ഡലം തിരിച്ചുപിടിക്കാനാകുമെന്ന ആത്മവിശ്വാസത്തിലാണ് യുഡിഎഫ്. ഓരോ വോട്ടുശതമാനവും നിർണ്ണായകമാകുന്ന ആറന്മുളയിൽ മുൻ തിരഞ്ഞെടുപ്പുകളിലെ മേധാവിത്വം നിലനിർത്താൻ എൽഡിഎഫിന് കഴിയുമോ അതോ അബിൻ വർക്കി അട്ടിമറി വിജയം നേടുമോ എന്ന ആകാംക്ഷയിലാണ് രാഷ്ട്രീയ കേന്ദ്രങ്ങൾ.