എയര്പോര്ട്ടിലേക്ക് വാട്ടര് മെട്രോ; സാധ്യത പഠന സമിതി പ്രവര്ത്തനം ആരംഭിച്ചു
കൊച്ചി നഗരത്തിലെ വിവിധ ഭാഗങ്ങളിലേക്കും പ്രാന്ത പ്രദേശങ്ങളിലേക്കും വാട്ടര് മെട്രോ സര്വീസ് ആരംഭിക്കണമെന്ന പൊതുജനങ്ങളുടെ നിരന്തര ആവശ്യം പരിഗണിച്ചാണ് ഈ തീരുമാനം
കൊച്ചി: എയര്പോര്ട്ടിലേക്ക് വാട്ടര് മെട്രോ സംബന്ധിച്ച സാധ്യതാ പഠന സമിതി പ്രവര്ത്തനം ആരംഭിച്ചു. ആലുവയില് നിന്ന് നെടുമ്പാശ്ശേരി വിമാനത്താവളത്തിലേക്ക് വാട്ടര് മെട്രോ സര്വീസ് ആരംഭിക്കുന്നത് സംബന്ധിച്ച സാധ്യതാ പഠനം നടത്തുന്നതിന് മുന്നോടിയായുള്ള പ്രാരംഭ പ്രവര്ത്തനങ്ങള് കൊച്ചി മെട്രോ റെയില് ലിമിറ്റഡ് ആരംഭിച്ചു. പ്രാരംഭ പഠനത്തിനായി രൂപീകരിച്ച ആഭ്യന്തര ഉന്നതതല കമ്മറ്റി പ്രവര്ത്തനം തുടങ്ങി. ഒരു മാസത്തിനുള്ളില് റിപ്പോര്ട്ട് സമര്പ്പിക്കും.
കൊച്ചി നഗരത്തിലെ വിവിധ ഭാഗങ്ങളിലേക്കും പ്രാന്ത പ്രദേശങ്ങളിലേക്കും വാട്ടര് മെട്രോ സര്വീസ് ആരംഭിക്കണമെന്ന പൊതുജനങ്ങളുടെ നിരന്തര ആവശ്യം പരിഗണിച്ചാണ് ഈ തീരുമാനം. കൊച്ചി മെട്രോയെ വിമാനത്താവളവുമായി ബന്ധിപ്പിക്കുന്ന സമാന്തര ഗതാഗത മാര്ഗമായി വികസിപ്പിക്കാന് സാധ്യതയുള്ളതിനാല് ആദ്യം ഈ റൂട്ടാണ് പരിഗണിക്കുന്നത്. കൊച്ചി മെട്രോയ്ക്കും സിയാലിനും കൂടുതല് യാത്രക്കാരെ ആകര്ഷിക്കാനും ഗതാഗത തടസം മൂലം യാത്രക്കാര്ക്കുള്ള ബുദ്ധിമുട്ട് കുറയ്ക്കാനും വാട്ടര് മെട്രോയ്ക്ക് കഴിയുമെന്നും പ്രതീക്ഷിക്കുന്നു.
പ്രാരംഭ പഠനത്തിന്റെ ഭാഗമായി ഏതുതരം ബോട്ടാണ് ഇവിടെ സര്വീസ് നടത്താന് സാധ്യയുള്ളതെന്ന് പഠിക്കും. കണക്ടിവിറ്റി ഏതൊക്കെ മാര്ഗത്തിലാകണമെന്നതും വിശദ പഠനത്തിന് വധേയമാക്കും.
What's Your Reaction?
