മദ്യലഹരിയിൽ ഡോക്ടർമാർ ഓടിച്ച ജീപ്പിടിച്ച് ബൈക്ക് യാത്രികൻ മരിച്ചു: സംഭവം തിരുവനന്തപുരം ആക്കുളത്ത്

തിരുവനന്തപുരം: മദ്യലഹരിയിൽ ഡോക്ടർമാർ ഓടിച്ച ജീപ്പിടിച്ച് ബൈക്ക് യാത്രികൻ മരിച്ചു. തിരുവനന്തപുരം ആക്കുളം പാലത്തിനു സമീപമാണ് അപകടം നടന്നത്. അപകടത്തിൽ പാറശ്ശാല സ്വദേശി മരിച്ചു. ഒരാൾ ഗുരുതര പരിക്കുകളോടെ ആശുപത്രിയിൽ ചികിത്സയിലാണ്. 

അമിത വേഗതയിൽ പോയ ജീപ്പ് നിയന്ത്രണം തെറ്റി ബൈക്കിലിടിക്കുകയായിരുന്നു. വിഷ്ണു, അതുൽ എന്ന യുവ ഡോക്ടർമാരാണ് ജീപ്പ് ഓടിച്ചിരുന്നത്. ഇരുവരും മദ്യപിച്ചിട്ടുണ്ടായിരുന്നു എന്നാണ് പൊലീസ് പറയുന്നത്. 

ബൈക്കിൽ സഞ്ചരിച്ച പാറശ്ശാല സ്വദേശികളായ ശ്രീറാം (26) ആണ് മരിച്ചത്. ഗുരുതരമായി പരിക്കേറ്റ ഷാനു (26) മെഡിക്കൽ കോളേജ് ആശുപത്രിയിൽ ചികിത്സയിലാണ്. സംഭവത്തിൽ വിഷ്ണുവിനെയും അതുലിനെയും തുമ്പ പൊലീസ് അറസ്റ്റ് ചെയ്തു.