ക്രൂരകൃത്യം നടത്തിയത് പണം കൊടുക്കാത്തതിന്’; സ്പായിൽ നിന്ന് പൊലീസ് മാസപ്പടി വാങ്ങുന്നതായി അറിയില്ലെന്നും ജില്ലാ പൊലീസ് മേധാവി

പത്തനംതിട്ട:തിരുവല്ല സ്പായിലെ ഗുണ്ടാ ആക്രമണത്തിലും ബലാത്സംഗത്തിലും വിശദീകരണവുമായി ജില്ലാ പൊലീസ് മേധാവി ആർ.ആനന്ദ്. പൊലീസിന്റെ ഭാഗത്തുനിന്ന് വീഴ്ചയുണ്ടായിട്ടില്ലെന്നും സംഭവത്തിൽ പരാതി ലഭിച്ചിരുന്നില്ലെന്നും അദ്ദേഹം വ്യക്തമാക്കി. വിവരമറിഞ്ഞതിന് പിന്നാലെ സമയബന്ധിതമായി നടപടിയെടുത്തു. സ്പാകളിൽനിന്ന് പൊലീസുകാർ മാസപ്പടി വാങ്ങുന്നതായി ശ്രദ്ധയിൽപ്പെട്ടിട്ടില്ല. നേരത്തേ ഇത്തരം വിഷയങ്ങൾ ശ്രദ്ധയിൽപ്പെട്ടപ്പോൾ ബന്ധപ്പെട്ടവർക്കെതിരേ ഉടനടി നടപടി സ്വീകരിച്ചിട്ടുണ്ടെന്നും അദ്ദേഹം വ്യക്തമാക്കി.

 ‘‘ഫെബ്രുവരി ഒന്നാം തീയതിയാണ് സംഭവമുണ്ടായത്. ആരും പരാതി തന്നിരുന്നില്ല. രണ്ടാം തീയതി ഉദ്യോഗസ്ഥർക്ക് ഇതേക്കുറിച്ച് വിവരം ലഭിച്ചപ്പോൾ തനിക്കും എസ്എച്ച്ഒയ്ക്കും അത് കൈമാറി. ജീവനക്കാരുടെ മൊഴിയെടുത്ത് കേസെടുത്തു. ഉടൻതന്നെ പ്രധാന പ്രതിയായ സുബിൻ അലക്‌സാണ്ടറിനെയും രണ്ടാംപ്രതിയായ ബെർലിൻദാസിനെയും പിടികൂടി. ബാക്കി പ്രതികൾക്കായി തിരുവല്ല ഡിവൈഎസ്പിയുടെ നേതൃത്വത്തിൽ പ്രത്യേകസംഘം അന്വേഷണം നടത്തുകയാണ്. അന്വേഷണം നല്ല രീതിയിൽ മുന്നോട്ടുപോകും. സംഭവം ക്വട്ടേഷൻ ആണോ എന്ന് വ്യക്തമല്ല. സ്പാ ഉടമയിൽനിന്ന് മൊഴിയെടുത്തു. കേസിൽ വീഴ്ചയുണ്ടായിട്ടില്ല. പണം ചോദിച്ചാണ് പ്രതികൾ സ്പായിൽവന്നത്. പണം കൊടുക്കാത്തതിനാണ് ക്രൂരമായ കൃത്യം നടത്തിയത്. സംഭവത്തിലെ അതിജീവിതയ്ക്ക് പൊലീസ് നിയമസഹായവും കൗൺസിലിങ്ങും നൽകും. ജില്ലയിലെ കാപ്പാ പ്രതികളെ മുഴുവൻസമയവും നിരീക്ഷിക്കും. ഡിജിറ്റൽ നിരീക്ഷണമടക്കം ഉണ്ടാകും’’ – ജില്ലാ പൊലീസ് മേധാവി വ്യക്തമാക്കി.