അറിയാതെ കൂടുന്ന ശരീരഭാരം; വില്ലൻ നിങ്ങളുടെ ഈ 10 ജീവിതശൈലീ പിഴവുകളാണോ?

തിരക്കുപിടിച്ച ജീവിതത്തിനിടയിൽ പലപ്പോഴും നമ്മൾ ആരോഗ്യകരമായ ശീലങ്ങൾ മറന്നുപോകാറുണ്ട്. എന്നാൽ ഭക്ഷണക്രമത്തിലും ഉറക്കത്തിലും വരുത്തുന്ന ചെറിയ മാറ്റങ്ങൾ പോലും മെറ്റബോളിസം മന്ദഗതിയിലാക്കാനും ഹൃദ്രോഗം, പ്രമേഹം തുടങ്ങിയ ഗുരുതരമായ ആരോഗ്യപ്രശ്നങ്ങളിലേക്ക് നയിക്കാനും കാരണമാകും.

ശരീരഭാരം വർധിപ്പിക്കുന്ന പ്രധാന ഘടകങ്ങൾ:

ഭക്ഷണം ഒഴിവാക്കൽ: ഭാരം കുറയ്ക്കാനായി ഭക്ഷണം മുടക്കുന്നത് വിപരീതഫലമാണ് നൽകുക. ഇത് ഇൻസുലിൻ അളവ് താളം തെറ്റിക്കാനും പിന്നീട് അമിതമായി ഭക്ഷണം കഴിക്കാനും കാരണമാകുന്നു.

രാത്രി വൈകിയുള്ള ഭക്ഷണം: രാത്രി എട്ട് മണിക്ക് ശേഷം കനത്ത ഭക്ഷണം കഴിക്കുന്നത് ദഹനത്തെയും ഉറക്കത്തെയും ബാധിക്കും. ഇത് കൊഴുപ്പ് അടിഞ്ഞുകൂടാൻ കാരണമാകും.

പഞ്ചസാര പാനീയങ്ങൾ: സോഫ്റ്റ് ഡ്രിങ്കുകൾ, പാക്കറ്റ് ജ്യൂസുകൾ എന്നിവയിൽ നാരുകൾ ഇല്ലാത്തതിനാൽ വിശപ്പ് മാറില്ലെന്ന് മാത്രമല്ല, ഇവ ഫാറ്റി ലിവർ സാധ്യത വർധിപ്പിക്കുകയും ചെയ്യുന്നു.

ഉറക്കക്കുറവ്: ദിവസവും 7 മുതൽ 9 മണിക്കൂർ വരെ ഉറക്കം അത്യാവശ്യമാണ്. ഉറക്കം കുറയുമ്പോൾ വിശപ്പ് വർധിപ്പിക്കുന്ന 'കോർട്ടിസോൾ' ഹോർമോണിന്റെ അളവ് കൂടുന്നു.

സ്ട്രെസ് ഈറ്റിങ്: മാനസിക സമ്മർദ്ദം അനുഭവപ്പെടുമ്പോൾ അത് മറികടക്കാൻ അമിതമായി ഭക്ഷണം കഴിക്കുന്ന ശീലം അമിതവണ്ണത്തിലേക്ക് നയിക്കുന്നു.

വെള്ളം കുടിക്കുന്നത് കുറയുന്നത്: പലപ്പോഴും ദാഹത്തെ വിശപ്പായി തെറ്റിദ്ധരിക്കാറുണ്ട്. ശരീരത്തിൽ വെള്ളം കുറയുന്നത് മെറ്റബോളിസത്തെ ബാധിക്കും.

ശ്രദ്ധയില്ലാതെ ഭക്ഷണം കഴിക്കൽ: ടിവിയോ ഫോണോ നോക്കി ഭക്ഷണം കഴിക്കുമ്പോൾ വയർ നിറഞ്ഞുവെന്ന സന്ദേശം തലച്ചോറിലെത്താൻ വൈകുന്നു. ഇത് അമിതമായി ഭക്ഷണം കഴിക്കാൻ പ്രേരിപ്പിക്കുന്നു.

വ്യായാമമില്ലായ്മ: ദീർഘനേരം ഒരേയിടത്ത് ഇരിക്കുന്നത് മെറ്റബോളിസം കുറയ്ക്കുന്നു. ജോലിക്കിടയിൽ ചെറിയ ഇടവേളകൾ എടുത്ത് ശരീരം ചലിപ്പിക്കേണ്ടത് അത്യാവശ്യമാണ്.

ഫാസ്റ്റ് ഫുഡും സംസ്കരിച്ച ഭക്ഷണവും: ഇവയിൽ കലോറി കൂടുതലും നാരുകൾ കുറവുമാണ്. ഇത് പെട്ടെന്ന് വിശപ്പ് ഉണ്ടാക്കുകയും ശരീരത്തിൽ വീക്കം (Inflammation) ഉണ്ടാക്കുകയും ചെയ്യുന്നു.

അനാരോഗ്യകരമായ ലഘുഭക്ഷണം: ഇടവേളകളിൽ എണ്ണപ്പലഹാരങ്ങളും മധുരവും കഴിക്കുന്നത് വിശപ്പ് കൂട്ടുകയേയുള്ളൂ.

ആരോഗ്യം നിലനിർത്താൻ ചില ടിപ്‌സുകൾ:

അത്താഴം നേരത്തെയാക്കുക: രാത്രി എട്ട് മണിക്ക് മുൻപ് ഭക്ഷണം കഴിച്ചു തീർക്കുക.

ജലാംശം നിലനിർത്തുക: ഭക്ഷണത്തിന് മുൻപ് വെള്ളം കുടിക്കുന്നത് അമിതാഹാരം ഒഴിവാക്കാൻ സഹായിക്കും.

കൃത്യമായ ഉറക്കം: രാത്രിയിലെ ഉറക്കം മുടക്കാതിരിക്കാൻ ശ്രദ്ധിക്കുക.