എം.പി.വി വിപണി പിടിക്കാൻ നിസാൻ 'ഗ്രാവിറ്റ്'; ഫെബ്രുവരി 17-ന് അരങ്ങേറ്റം

പ്രമുഖ കാർ നിർമ്മാതാക്കളായ നിസാൻ തങ്ങളുടെ പുതിയ എം.പി.വി മോഡലായ 'നിസാൻ ഗ്രാവിറ്റ്' (Nissan Gravit) ഫെബ്രുവരി 17-ന് വിപണിയിൽ ഔദ്യോഗികമായി പ്രദർശിപ്പിക്കുമെന്ന് സ്ഥിരീകരിച്ചു. ജനുവരിയിൽ അവതരിപ്പിക്കാൻ നിശ്ചയിച്ചിരുന്ന മോഡൽ ചില മാറ്റങ്ങളോടെയാണ് ഇപ്പോൾ എത്തുന്നത്.

ഹെഡ്‌ലാമ്പ് ക്ലസ്റ്ററുകൾക്കുള്ളിലെ എൽ.ഇ.ഡി ഡി.ആർ.എല്ലുകൾ (LED DRLs), മുൻവശത്തെ ഗ്രില്ലിലെ ക്രോം സ്ലാറ്റ്, ബോണറ്റിലെ പ്രമുഖമായ 'ഗ്രാവിറ്റ്' ലെറ്ററിംഗ് എന്നിവ കാറിന് സ്റ്റൈലിഷ് ലുക്ക് നൽകുന്നു. ടെയിൽഗേറ്റിന് കുറുകെയുള്ള തിരശ്ചീന ഇൻസേർട്ട് ഉപയോഗിച്ച് ബന്ധിപ്പിച്ച സ്പ്ലിറ്റ് ടെയിൽ-ലാമ്പ് ഡിസൈനാണ് ഇതിനുള്ളത്.

വെള്ള, വെള്ളി, കറുപ്പ്, ചാര നിറങ്ങൾക്കൊപ്പം ഗ്രാവിറ്റ് സിഗ്നേച്ചർ 'ടീൽ' ഷേഡിലും (Teal Shade) വാഹനം ലഭ്യമാകും. റെനോ ട്രൈബറിനെ അടിസ്ഥാനമാക്കിയാണ് ഗ്രാവിറ്റ് നിർമ്മിച്ചിരിക്കുന്നത്. 1.0 ലിറ്റർ പെട്രോൾ എൻജിൻ. മാനുവൽ, എഎംടി (AMT) ഓപ്ഷനുകളിൽ ലഭ്യമാണ്. ഫെബ്രുവരി അവസാനത്തോടെ വാഹനത്തിന്റെ വില കമ്പനി പുറത്തുവിടും. മാർച്ച് മാസം മുതൽ കാറുകൾ ഉപഭോക്താക്കൾക്ക് കൈമാറി തുടങ്ങും.