സർക്കീട്ട് ടീസർ പ്രകാശനം ചെയ്തു 

തിരുവനന്തപുരം: മികച്ച അഭിപ്രായത്തോടെ പ്രേഷകർ ഏറ്റെടുത്ത പൊൻമാൻ എന്ന ചിത്രത്തിനു ശേഷം അജിത് വിനായക ഫിലിംസ് വിത്ത് ആക്ഷൻ ഫിലിംസിൻ്റെ ബാനറിൽ വിനായക അജിത്, ഫ്ളോറിൻ ഡൊമിനിക്ക് എന്നിവർ നിർമ്മിച്ച് താമർ തിരക്കഥ രചിച്ച് സംവിധാനം ചെയ്യുന്ന സർക്കീട്ട് എന്ന ചിത്രത്തിൻ്റെ ടീസർ പ്രകാശനം ചെയ്തു.

ആസിഫ് അലിയും ബാലതാരം ഒർഹാനും ആകാശത്തെ നക്ഷത്രങ്ങളെ നോക്കി കഥകൾ പറയുന്ന രംഗത്തോടെയാണ് ടീസർ പുറത്തുവന്നിരിക്കുന്നത്. ആസിഫ് അലിയുടെ ജൻമദിനത്തിൽ അദ്ദേഹത്തിനുള്ള ജന്മദിന സമ്മാനമായിട്ടാണ് ടീസർ പ്രകാശനം ചെയ്തിരിക്കുന്നത്.

സോണി ലൈവിൽ പ്രദർശിപ്പിക്കുകയും നിരവധി അന്താരാഷ്ട്ര ഫിലിം ഫെസ്റ്റിവലുകളിൽ പ്രേക്ഷകരുടെ പ്രശംസ പിടിച്ചു പറ്റുകയും ചെയ്ത ആയിരത്തിയൊന്നു നുണകൾ എന്ന ചിത്രത്തിനു ശേഷം താമർ സംവിധാനം ചെയ്യുന്ന ചിത്രം കൂടിയാണിത്.

ആസിഫ് അലിയും ഓർഹാൻ എന്ന കുട്ടിയുമടങ്ങുന്ന ഫസ്റ്റ് ലുക്ക് പോസ്റ്റർ' പുറത്തുവിട്ടത് ഏറെ വൈറലായിരുന്നു. ഇവർ ഇരുവരുമാണ് ചിത്രത്തിലെ കേന്ദ്ര കഥാപാത്രങ്ങളെ അവതരിപ്പിക്കുന്നത്.

പൂർണ്ണമായും ഗൾഫിൻ്റെ പശ്ചാത്തലത്തിൽ ചിത്രീകരിച്ചിരിക്കുന്ന ഈ ചിത്രത്തിൻ്റെ ചിത്രീകരണം ദുബായ്, ഷാർജ, ഫ്യുജറ, റാസൽഖൈമ എന്നീവിടങ്ങളിലാണ് പൂർത്തികരിച്ചിരിക്കുന്നത്.

സൗഹൃദത്തിൻ്റെയും ബന്ധങ്ങളുടേയും പശ്ചാത്തലത്തിലൂടെ തികഞ്ഞ ഫീൽഗുഡ് സിനിമയായിട്ടാണ് ഈ ചിത്രത്തിൻ്റെ അവതരണം. പുറത്തുവിട്ടിരിക്കുന്ന ടീസറും ഒരു ഫീൽ ഗുഡ് സിനിമക്ക് ഏറെ അനുയോജ്യമാകും വിധത്തിൽ തന്നെയുള്ളതാണ്.

കുട്ടികൾക്ക് ഏറെ ആസ്വാദകരമാകുന്ന സർക്കീട്ടിൽ പ്രശാന്ത് അലക്സാണ്ടർ, രമ്യ സുരേഷ്, സ്വാതി ദാസ് പ്രഭു, സിൻസ് ഷാൻ, ഗോപൻ അടാട്ട് എന്നിവരും ഏതാനും പുതുമുഖങ്ങളും അണിനിരക്കുന്നു.

ഏതു ദേശത്തിനും ഭാഷയ്ക്കും സ്വീകാര്യമാകുന്ന ഒരു യുണിവേഴ്സൽ സബ്ജക്റ്റാണ് ഈ ചിത്രത്തിന്റെ ഇതിവൃത്തം.

ഗാനങ്ങൾ- അൻവർ അലി, സുഹൈൽ എം. കോയ.
സംഗീതം- ഗോവിന്ദ് വസന്ത.
ഛായാഗ്രഹണം- അയാസ് ഹസൻ.
എഡിറ്റിംഗ്- സംഗീത് പ്രതാപ്.
കലാസംവിധാനം- വിശ്വന്തൻ അരവിന്ദ്.
വസ്ത്രാലങ്കാരം- ഇർഷാദ് ചെറുകുന്ന്.
മേക്കപ്പ്- സുധി, ലൈൻ.
നിശ്ചല ഛായാഗ്രഹണം- എസ്.ബി.കെ. ഷുഹൈബ്.
പ്രൊജക്റ്റ് ഡിസൈൻ- രഞ്ജിത്ത് കരുണാകരൻ.
പി ആർ ഒ- വാഴൂർ ജോസ്.

പോസ്റ്റ് പ്രൊഡക്ഷൻ ജോലികൾ പുരോഗമിക്കുന്ന ഈ ചിത്രം ഏപ്രിൽ മാസത്തിൽ പ്രദർശനത്തിനെ
ത്തുന്നു.