ക്രിമിയയിൽ റഷ്യൻ സൈനിക വിമാനം തകർന്നു വീണു; 29 മരണം

മോസ്‌കോ: റഷ്യൻ നിയന്ത്രണത്തിലുള്ള ക്രിമിയയിൽ സൈനിക വിമാനം തകർന്നു വീണ് വൻ ദുരന്തം. വിമാനത്തിലുണ്ടായിരുന്ന 29 പേരും മരിച്ചതായി റഷ്യൻ പ്രതിരോധ മന്ത്രാലയം സ്ഥിരീകരിച്ചു. ബുധനാഴ്ച പുലർച്ചെ പർവ്വത മേഖലയിലാണ് അപകടമുണ്ടായത്.

റഷ്യൻ പ്രതിരോധ മന്ത്രാലയത്തിന്റെ എഎൻ-26 (An-26) കാർഗോ വിമാനമാണ് അപകടത്തിൽപ്പെട്ടത്. 23 യാത്രക്കാരും ആറ് ക്രൂ അംഗങ്ങളുമാണ് വിമാനത്തിലുണ്ടായിരുന്നത്. ആരും തന്നെ രക്ഷപ്പെട്ടിട്ടില്ലെന്ന് ഔദ്യോഗിക വാർത്താ ഏജൻസിയായ ടാസ് റിപ്പോർട്ട് ചെയ്തു.

പർവ്വത മേഖലയിൽ ലാൻഡ് ചെയ്യാൻ ശ്രമിക്കുന്നതിനിടെ വിമാനത്തിന് എയർ ട്രാഫിക് കൺട്രോളുമായുള്ള ബന്ധം നഷ്ടപ്പെടുകയായിരുന്നു. തുടർന്ന് വിമാനം നിയന്ത്രണം വിട്ട് പാറക്കെട്ടിലിടിച്ച് തകരുകയായിരുന്നു. അപകടവിവരമറിഞ്ഞ് രക്ഷാപ്രവർത്തകർ സ്ഥലത്തെത്തിയെങ്കിലും വിമാനം പൂർണ്ണമായും തകർന്നിരുന്നു. വിമാനത്തിലുണ്ടായിരുന്ന എല്ലാവരും തൽക്ഷണം മരിച്ചതായാണ് വിവരം.

പ്രാഥമിക പരിശോധനയിൽ അട്ടിമറി ശ്രമങ്ങളൊന്നും നടന്നതായി കണ്ടെത്തിയിട്ടില്ല. വിമാനത്തിന്റെ സാങ്കേതിക തകരാറാണ് അപകടത്തിന് പിന്നിലെന്നാണ് വിലയിരുത്തൽ. അപകടകാരണം കണ്ടെത്താൻ പ്രതിരോധ മന്ത്രാലയത്തിന്റെ പ്രത്യേക അന്വേഷണ സമിതി സ്ഥലത്തെത്തി വിമാനത്തിന്റെ അവശിഷ്ടങ്ങൾ പരിശോധിച്ചു വരികയാണ്. 2014-ൽ യുക്രെയ്നിൽ നിന്ന് റഷ്യ പിടിച്ചെടുത്ത വിമാനമാണ് ഇപ്പോൾ അപകടത്തിൽപ്പെട്ടതെന്ന് റിപ്പോർട്ടുകൾ സൂചിപ്പിക്കുന്നു.