പ്രസവശേഷമുള്ള ആർത്തവം: മാറ്റങ്ങൾ അറിയാം; വേദനയിലും രക്തസ്രാവത്തിലും വ്യത്യാസമുണ്ടാകാം

പ്രസവശേഷം അമ്മമാരുടെ ശരീരം സാധാരണ നിലയിലേക്ക് മടങ്ങുമ്പോൾ ഏറ്റവും കൂടുതൽ സംശയങ്ങൾ ഉയരുന്നത് ആർത്തവ ചക്രത്തെക്കുറിച്ചാണ്. ഹോർമോൺ വ്യതിയാനങ്ങളും മുലയൂട്ടലും അനുസരിച്ച് ഓരോ സ്ത്രീകളിലും ആർത്തവം പുനരാരംഭിക്കുന്ന സമയം വ്യത്യസ്തമായിരിക്കും.

ഗർഭകാലത്ത് നിലച്ചിരുന്ന ആർത്തവ ചക്രം പ്രസവശേഷം എപ്പോൾ തുടങ്ങും, എന്തൊക്കെ മാറ്റങ്ങൾ പ്രതീക്ഷിക്കാം എന്നതിനെക്കുറിച്ച് വിദഗ്ധർ നൽകുന്ന വിവരങ്ങൾ താഴെ പറയുന്നവയാണ്. മുലപ്പാൽ ഉൽപാദനത്തിന് സഹായിക്കുന്ന പ്രോലാക്റ്റിൻ എന്ന ഹോർമോൺ അണ്ഡോത്പാദനത്തെ തടയുന്നതിനാൽ മുലയൂട്ടുന്ന അമ്മമാരിൽ ആർത്തവം വൈകാൻ സാധ്യതയുണ്ട്. ചിലർക്ക് ആറ് മാസമോ ഒരു വർഷമോ വരെ ഇത് നീണ്ടുനിൽക്കാം.

മുലയൂട്ടാത്തവരിൽ കുഞ്ഞിന് മുലപ്പാൽ നൽകാത്തവരിൽ പ്രസവശേഷം 6 മുതൽ 8 ആഴ്ചയ്ക്കുള്ളിൽ തന്നെ ആർത്തവം പുനരാരംഭിക്കാറുണ്ട്. പ്രസവത്തിന് തൊട്ടുപിന്നാലെയുള്ള രക്തസ്രാവത്തെ ആർത്തവമായി തെറ്റിദ്ധരിക്കരുത്. ഇത് ഗർഭപാത്രത്തിലെ അവശിഷ്ടങ്ങൾ പുറന്തള്ളുന്ന പ്രക്രിയയാണ്.

എന്തൊക്കെ മാറ്റങ്ങൾ പ്രതീക്ഷിക്കാം?

ആദ്യത്തെ കുറച്ചു മാസങ്ങളിൽ ആർത്തവം കൃത്യമായ തീയതികളിൽ ആകണമെന്നില്ല.

രക്തസ്രാവം കൂടാനോ കുറയാനോ സാധ്യതയുണ്ട്. ഗർഭപാത്രത്തിന്റെ ഘടനയിലുണ്ടാകുന്ന മാറ്റങ്ങൾ കാരണം ചിലർക്ക് ആർത്തവ വേദന മുൻപത്തേക്കാൾ കുറയാറുണ്ട്. എന്നാൽ എൻഡോമെട്രിയോസിസ് പോലുള്ള പ്രശ്നങ്ങളുള്ളവർക്ക് വേദന വർധിക്കാം.

ശ്രദ്ധിക്കേണ്ട അപകട ലക്ഷണങ്ങൾ:

താഴെ പറയുന്ന ലക്ഷണങ്ങൾ കണ്ടാൽ ഉടൻ ഡോക്ടറുടെ സഹായം തേടണം:

ഒരു മണിക്കൂറിൽ ഒരു പാഡ് എന്ന കണക്കിൽ അതിശക്തമായ രക്തസ്രാവം ഉണ്ടാകുക.

വലിയ രക്തക്കട്ടകൾ (Clots) പോകുന്നത് ശ്രദ്ധയിൽപ്പെട്ടാൽ.

മുലയൂട്ടൽ നിർത്തി മൂന്ന് മാസമായിട്ടും ആർത്തവം വന്നില്ലെങ്കിൽ.

കഠിനമായ വേദനയോ ദുർഗന്ധത്തോടു കൂടിയ സ്രവങ്ങളോ ഉണ്ടാകുക.

ആർത്തവചക്രം പുനരാരംഭിക്കുന്ന ഘട്ടത്തിൽ അയൺ, കാൽസ്യം, പ്രോട്ടീൻ എന്നിവ അടങ്ങിയ ഭക്ഷണക്രമം പാലിക്കാൻ ശ്രദ്ധിക്കണം. ആർത്തവ തീയതികൾ കലണ്ടറിലോ ആപ്പുകളിലോ രേഖപ്പെടുത്തുന്നത് ശാരീരിക മാറ്റങ്ങൾ എളുപ്പത്തിൽ തിരിച്ചറിയാൻ സഹായിക്കും.