ചോറിനെ ഒഴിവാക്കേണ്ടതില്ല: കാർബോഹൈഡ്രേറ്റ് ശരീരത്തിന് ആവശ്യമായ ഊർജ്ജം

ഇന്ത്യക്കാരുടെ പ്രധാന ഭക്ഷണമായ ചോറ്, കാർബോഹൈഡ്രേറ്റ് കാരണം ശരീരത്തിൽ വീക്കം, അസ്ഥികളുടെ ബലഹീനത, ശരീരഭാരം വർധിക്കൽ എന്നിവയ്ക്ക് കാരണമാകുമെന്ന വാദത്തെ തുടർന്ന് പലരും ഡയറ്റിൽ നിന്ന് പൂർണമായും ഒഴിവാക്കുന്ന പ്രവണതയുണ്ട്. എന്നാൽ ഇത് വെറും തെറ്റിദ്ധാരണയാണെന്നും കാർബോഹൈഡ്രേറ്റ് പൂർണ്ണമായി ഒഴിവാക്കുന്നത് ആരോഗ്യത്തിന് സുരക്ഷിതമല്ലെന്നും ഓർത്തോപീഡിക് സർജൻ ഡോ. മനൻ വോറ പറയുന്നു.

കാർബോഹൈഡ്രേറ്റിനെ ശത്രുവായി കാണേണ്ടതില്ല. നമ്മുടെ ശരീരത്തിന് ആവശ്യമായ അവശ്യ പോഷകമാണ് ഇത്. തലച്ചോറിനും പേശികൾക്കും ശക്തി നൽകുന്നതും അസ്ഥികളുടെ ആരോഗ്യത്തെ പിന്തുണയ്ക്കുന്നതുമായ പ്രാഥമിക ഇന്ധനമാണ് കാർബോഹൈഡ്രേറ്റ്.

കാർബോഹൈഡ്രേറ്റ് കുറയുന്നത് പേശികളെ ദുർബലപ്പെടുത്താം. പേശികളുടെ വീണ്ടെടുക്കലിന് കാർബോഹൈഡ്രേറ്റിൽ നിന്ന് ലഭിക്കുന്ന ഗ്ലൈക്കോജൻ അത്യന്താപേക്ഷിതമാണ്. ഭക്ഷണത്തിൽ കാർബോഹൈഡ്രേറ്റ് കുറയുമ്പോൾ, ഗ്ലൈക്കോജൻ സംഭരണം കുറയുകയും പേശികൾ വേഗത്തിൽ ക്ഷീണിക്കുകയും ചെയ്യും. ഇത് അസ്ഥികളെ താങ്ങി നിർത്തുന്ന കലകൾക്ക് (Supportive Tissue) കൂടുതൽ സൂക്ഷ്മമായ സമ്മർദ്ദം (Micro-stress) ഉണ്ടാകാൻ കാരണമാകും.

അരി കാർബോഹൈഡ്രേറ്റിൻ്റെ ഉറവിടം മാത്രമല്ല, അതിൽ മറ്റ് അവശ്യ പോഷകങ്ങളും അടങ്ങിയിട്ടുണ്ട്:
ഇത് ശരീരത്തിന് എളുപ്പത്തിൽ ഊർജ്ജം ലഭ്യമാക്കാൻ സഹായിക്കുന്നു. ഗ്ലൂട്ടൻ രഹിതമാണ്.
കൊഴുപ്പും സോഡിയവും കുറവാണ്. ബി വിറ്റാമിനുകൾ, ഇരുമ്പ്, മഗ്നീഷ്യം തുടങ്ങിയ പോഷകങ്ങളാൽ സമ്പുഷ്ടമാണ്.

മറ്റെല്ലാ ഭക്ഷണങ്ങളെയും പോലെ, അരി കഴിക്കുമ്പോഴും മിതത്വം പാലിക്കുക എന്നതാണ് പ്രധാനം. ഏതെങ്കിലും ഭക്ഷണം പൂർണ്ണമായും ഒഴിവാക്കുന്നതിനെക്കുറിച്ച് ചിന്തിക്കാതെ, ശരീരത്തിന് യഥാർത്ഥത്തിൽ ആവശ്യമായത് എന്താണെന്ന് മനസ്സിലാക്കുകയാണ് ആരോഗ്യത്തിന് പ്രധാനമെന്നും ഡോ. മനൻ വോറ ഉപദേശിക്കുന്നു.