കെപിസിസി അധ്യക്ഷൻ കെ സുധാകരന്റെ മൊഴിയെടുത്തു

കണ്ണൂർ: വയനാട് ഡി സി സി ട്രഷറർ ആയിരുന്ന എൻ എം വിജയന്റെ ആത്മഹത്യയുമായി ബന്ധപ്പെട്ട് അന്വേഷണ സംഘം കെപിസിസി അധ്യക്ഷൻ കെ സുധാകരന്റെ മൊഴിയെടുത്തു. കണ്ണൂർ നടാലിലെ വീട്ടിലെത്തിയാണ് ബത്തേരി ഡിവൈഎസ്പിയും സംഘവും മൊഴി എടുത്തത്. എൻ എം വിജയന്‍റെ ആത്മഹത്യാ കേസില്‍ വയനാട് ഡിസിസി ഓഫീസിൽ നേരത്തെ പൊലീസ് പരിശോധന നടത്തിയിരുന്നു. സാമ്പത്തിക ഇടപാടുകളുമായി ബന്ധപ്പെട്ടാണ് അന്വേഷണം നടക്കുന്നത്. വിജയൻ കെപിസിസി അധ്യക്ഷന് എഴുതിയ കത്തിലെ വിവരങ്ങളാണ് ചോദിച്ചത് എന്നാണ് വിവരം.

അതിനിടെ എൻ എം വിജയൻ നൽകിയ കത്തുമായി ബന്ധപ്പെട്ട വിശദാശംങ്ങൾ ചോദിച്ചതായി കെ സുധാകരന്‍ മാധ്യമങ്ങളോട് പറഞ്ഞു. കൃത്യമായി മറുപടി നൽകിയെന്നും കെപിസിസി സമിതി ഈ കാര്യങ്ങളെല്ലാം അന്വേഷിച്ചതാണെന്നും കെ സുധാകരൻ പറഞ്ഞു. അതിൽ തെറ്റുകാരാണെന്ന് കണ്ടെത്തിയവർക്കെതിരെ നടപടി എടുക്കു മെന്ന് അദ്ദേഹം വ്യക്തമാക്കി.