യു.കെയിൽ ജോലി ചെയ്യുന്നതിന് ഡിജിറ്റൽ ഐ.ഡി. നിർബന്ധമാക്കും

ലണ്ടന്‍: നിയമവിരുദ്ധമായ കുടിയേറ്റം തടയുന്നതിനുള്ള കർശന പദ്ധതികളുടെ ഭാഗമായി, യു.കെയിൽ ജോലി ചെയ്യുന്നതിന് ഡിജിറ്റൽ ഐ.ഡി. നിർബന്ധമാക്കുമെന്ന് പ്രധാനമന്ത്രി കെയ്ര്‍ സ്റ്റാർമർ പ്രഖ്യാപിച്ചു. പുതിയ ഡിജിറ്റൽ ഐ.ഡി. സംവിധാനം രാജ്യത്ത് അനധികൃതമായി ജോലി ചെയ്യുന്നത് കൂടുതൽ ദുഷ്‌കരമാക്കുമെന്നും പൗരന്മാർക്ക് നിരവധി പ്രയോജനങ്ങൾ നൽകുമെന്നും അദ്ദേഹം വ്യക്തമാക്കി.

"ഓരോ രാജ്യത്തിനും അതിർത്തികളിൽ നിയന്ത്രണം ആവശ്യമാണ് എന്നതാണ് ലളിതമായ സത്യം. നമ്മുടെ രാജ്യത്ത് ആരാണുള്ളതെന്ന് നമ്മൾ അറിയേണ്ടതുണ്ട്," സ്റ്റാർമർ പറഞ്ഞു. ബ്രിട്ടീഷ് പ്രധാനമന്ത്രി ഡിജിറ്റൽ ഐ.ഡി. പദ്ധതിയുടെ ആവശ്യകതയെക്കുറിച്ച് പറഞ്ഞത് ഇങ്ങനെ:

"സുരക്ഷിതമായ ഒരു അതിർത്തിയും നിയന്ത്രിത കുടിയേറ്റവും ന്യായമായ ആവശ്യങ്ങളാണ്, ഈ സർക്കാർ അത് ശ്രദ്ധിക്കുകയും നടപ്പിലാക്കുകയും ചെയ്യും. ഡിജിറ്റൽ ഐ.ഡി. യു.കെയ്ക്ക് ഒരു വലിയ അവസരമാണ്. ഇത് ഈ രാജ്യത്ത് നിയമവിരുദ്ധമായി ജോലി ചെയ്യുന്നത് കൂടുതൽ കഠിനമാക്കുകയും നമ്മുടെ അതിർത്തികൾ കൂടുതൽ സുരക്ഷിതമാക്കുകയും ചെയ്യും. കൂടാതെ, സേവനങ്ങൾ വേഗത്തിൽ ലഭ്യമാക്കുന്നതിന് നിങ്ങളുടെ ഐഡന്‍റിറ്റി തെളിയിക്കാൻ കഴിയുന്നത് പോലുള്ള എണ്ണമറ്റ പ്രയോജനങ്ങൾ സാധാരണ പൗരന്മാർക്ക് ഇത് നൽകും."