പാലക്കാട് ജില്ലാ ആശുപത്രിയില്‍ ചികിത്സാ പിഴവെന്ന് പരാതി; ഒന്‍പത് വയസുകാരിയുടെ കൈ മുറിച്ചുമാറ്റി

പാലക്കാട്/കോഴിക്കോട്: പാലക്കാട് ജില്ലാ ആശുപത്രിയിലുണ്ടായ ചികിത്സാ പിഴവിനെത്തുടർന്ന് ഒന്‍പതുവയസുകാരിക്ക് കൈ നഷ്ടമായി. പാലക്കാട് പല്ലശന സ്വദേശിനിയായ വിനോദിനി എന്ന കുട്ടിയുടെ വലതുകൈയാണ് മുറിച്ചുമാറ്റേണ്ടി വന്നത്. കുട്ടിയുടെ നില അതീവ ഗുരുതരമായതിനെ തുടർന്ന് കോഴിക്കോട് മെഡിക്കൽ കോളേജ് ആശുപത്രിയിൽ എത്തിക്കുകയും അവിടെവെച്ച് കൈ മുറിച്ചുമാറ്റുകയുമായിരുന്നു.

സെപ്തംബർ 24ന് വൈകീട്ട് വീട്ടിൽ കളിക്കുന്നതിനിടെ വീണാണ് വിനോദിനിക്ക് കൈക്ക് പരിക്കേറ്റത്. കുട്ടിയെ ആദ്യം ചിറ്റൂർ ആശുപത്രിയിലും തുടർന്ന് പാലക്കാട് ജില്ലാ ആശുപത്രിയിലും എത്തിച്ചു. കുട്ടിയുടെ കൈയിൽ മുറിവും പൊട്ടലും ഉണ്ടായിരുന്നു. കൈയിലെ മുറിവിൽ മരുന്നുവെച്ച് കെട്ടിയ ശേഷം അതിനുമേലെ പ്ലാസ്റ്ററിട്ടു എന്നാണ് കുടുംബം ആരോപിക്കുന്നത്.

കുട്ടിക്ക് അതിശക്തമായ വേദനയുണ്ടെന്ന് പറഞ്ഞിട്ടും ആശുപത്രി അധികൃതർ അത് വകവെച്ചില്ല.
പിന്നീട്, വേദന സഹിക്കാനാവാതെ കുട്ടിയെ വീണ്ടും ആശുപത്രിയിൽ എത്തിച്ചപ്പോൾ പ്ലാസ്റ്റർ അഴിച്ച് പരിശോധിച്ചു. അപ്പോഴേക്കും കൈയിലെ മുറിവ് പഴുത്ത് വല്ലാത്ത അവസ്ഥയിലായിരുന്നു. തുടർന്നാണ് കോഴിക്കോട് മെഡിക്കൽ കോളേജ് ആശുപത്രിയിലേക്ക് മാറ്റിയത്.

"ആദ്യം ജില്ലാ ആശുപത്രിയിൽ പോയപ്പോൾ അവർ സ്‌കാനിങ് എടുക്കാൻ പറഞ്ഞു. സ്‌കാനിങ് എടുത്തപ്പോൾ രണ്ട് പൊട്ടലുണ്ടെന്ന് പറഞ്ഞു. മുറിവും ഉണ്ട്. എന്നാൽ, മുറിവിൽ മരുന്നുവെച്ച് കെട്ടി നാളെ വന്നാൽ മതിയെന്ന് പറഞ്ഞ് പറഞ്ഞുവിട്ടു. കുട്ടിയ്ക്ക് ഭയങ്കര വേദനയുണ്ടായി. കൈ നിവർത്താൻ പറ്റിയില്ല. പിറ്റേന്ന് അക്കാര്യം പറഞ്ഞപ്പോൾ, കുഴപ്പമില്ല, എല്ലിന് സംഭവിച്ചതല്ലേ അതുകൊണ്ടാകുമെന്ന് പറഞ്ഞു. അഞ്ചുദിവസം കഴിഞ്ഞ് വന്നാൽ മതിയെന്നും പറഞ്ഞു. പക്ഷേ, വേദന കാരണം അഞ്ചുദിവസമാകും മുൻപേ പോയി. അവിടെവെച്ച് അഴിച്ചുനോക്കിയപ്പോൾ കൈ ആകെ വല്ലാത്ത അവസ്ഥയിലായിരുന്നു. അളിഞ്ഞ് ചോരയൊക്കെ വന്ന് വല്ലാത്തൊരു മണമൊക്കെ ആയിരുന്നു," കുട്ടിയുടെ അമ്മ പ്രസീദ കണ്ണീരോടെ പറഞ്ഞു.

ചികിത്സാ പിഴവിനെത്തുടർന്ന് കുട്ടിയുടെ കൈ മുറിച്ചുമാറ്റേണ്ടിവന്ന സംഭവത്തിൽ പാലക്കാട് ജില്ലാ ആശുപത്രിക്കെതിരെ വൻ പ്രതിഷേധമാണ് ഉയരുന്നത്. കോൺഗ്രസിൻ്റെ നേതൃത്വത്തിൽ ആശുപത്രിയിലേക്ക് പ്രതിഷേധ മാർച്ച് സംഘടിപ്പിച്ചു. സംഭവത്തിൽ കുടുംബം വെള്ളിയാഴ്ച ഡിഎംഒയ്ക്ക് (DMO) ഔദ്യോഗികമായി പരാതി നൽകിയിട്ടുണ്ട്.