തിങ്കളാഴ്ച മുതൽ കേരളത്തിലും; കർണാടകയിലെ ‘ശക്തി’ പോലെ സ്ത്രീജീവിതത്തിൽ മാറ്റമുണ്ടാക്കുമോ സൗജന്യ ബസ് യാത്രാ പദ്ധതി?

കേരളത്തിൽ സ്ത്രീകൾക്കായുള്ള കെഎസ്ആർടിസി സൗജന്യ യാത്രാ പദ്ധതിക്ക് തിങ്കളാഴ്ച തുടക്കമാകുമ്പോൾ, അയൽസംസ്ഥാനമായ കർണാടകയിലെ ‘ശക്തി’ പദ്ധതിയുടെ വിജയമാണ് ഏറെ ചർച്ചയാകുന്നത്. സാമ്പത്തിക പരിമിതികൾ കാരണം വീടുകളിൽ ഒതുങ്ങിപ്പോയിരുന്ന ലക്ഷക്കണക്കിന് സ്ത്രീകൾക്ക് സ്വതന്ത്രമായി യാത്ര ചെയ്യാനും തൊഴിൽ, വിദ്യാഭ്യാസം, ആരോഗ്യസേവനങ്ങൾ എന്നിവ കൂടുതൽ എളുപ്പത്തിൽ ലഭ്യമാക്കാനും കർണാടകയിലെ പദ്ധതി സഹായിച്ചു.

ദൂരെയുള്ള വിദ്യാഭ്യാസ സ്ഥാപനങ്ങളിലേക്ക് യാത്ര ചെയ്യേണ്ടിവരുന്ന വിദ്യാർഥിനികൾക്കും പദ്ധതി വലിയ ആശ്വാസമായി. യാത്രാചെലവിന്റെ ഭാരം കുറഞ്ഞതോടെ കൂടുതൽ പെൺകുട്ടികൾക്ക് പഠനം തുടരാനും പുതിയ അവസരങ്ങൾ തേടാനും സാധിച്ചു. സ്ത്രീകളുടെ സാമൂഹിക-സാമ്പത്തിക മുന്നേറ്റത്തിലും ഈ പദ്ധതി ഗണ്യമായ മാറ്റങ്ങൾ സൃഷ്ടിച്ചുവെന്നാണ് വിലയിരുത്തൽ.

കർണാടകയിലേക്ക് കുടിയേറിയ മലയാളി കുടുംബങ്ങളിലെ സ്ത്രീകൾക്കും ‘ശക്തി’ പദ്ധതി വലിയ സഹായമായിട്ടുണ്ട്. കേരളത്തിൽ ആരംഭിക്കുന്ന സൗജന്യ യാത്രാ പദ്ധതിയും സ്ത്രീകളുടെ സഞ്ചാരസ്വാതന്ത്ര്യം വർധിപ്പിക്കുന്നതിനൊപ്പം തൊഴിൽ, വിദ്യാഭ്യാസ, സാമൂഹിക പങ്കാളിത്ത മേഖലകളിൽ സമാനമായ മാറ്റങ്ങൾ സൃഷ്ടിക്കുമോയെന്ന ആകാംക്ഷയിലാണ് പലരും.