യുഎസ്-ഇറാന്‍ വെടിനിര്‍ത്തല്‍ നീട്ടി ;പാകിസ്താന്റെ നയതന്ത്ര ഇടപെടലിന് അംഗീകാരവുമായി ഡൊണാള്‍ഡ് ട്രംപ്

യുഎസ്-ഇറാൻ സംഘർഷത്തിൽ നിർണ്ണായകമായ വഴിത്തിരിവാണ് പുതിയ പ്രഖ്യാപനത്തിലൂടെ ഉണ്ടായിരിക്കുന്നത്. പാകിസ്താന്റെ നയതന്ത്ര ഇടപെടലുകൾക്ക് വലിയ പ്രാധാന്യം നൽകിക്കൊണ്ട്, ഇറാനുമായുള്ള വെടിനിർത്തൽ അനിശ്ചിതമായി നീട്ടാൻ യുഎസ് പ്രസിഡന്റ് ഡൊണാൾഡ് ട്രംപ് തീരുമാനിച്ചു.

തകർന്നുപോയ ഇറാൻ ഭരണകൂടത്തിന് സമാധാനത്തിനുള്ള ഏകീകൃത നിർദേശം സമർപ്പിക്കാൻ കൂടുതൽ സമയം നൽകുകയാണ് ഇതിലൂടെ ലക്ഷ്യമിടുന്നത്. പാക് പ്രധാനമന്ത്രി ഷഹബാസ് ഷെരീഫ്, സൈനിക മേധാവി അസിം മുനീർ എന്നിവരുടെ അഭ്യർഥനകൾ ട്രംപ് അംഗീകരിച്ചതോടെ, ഹോർമുസിലെ നാവിക ഉപരോധം നിലനിർത്തിക്കൊണ്ടുതന്നെ താൽക്കാലികമായി ആക്രമണങ്ങൾ ഒഴിവാക്കപ്പെടും.

തങ്ങളുടെ നയതന്ത്ര ശ്രമങ്ങളിൽ വിശ്വാസമർപ്പിച്ചതിന് ട്രംപിന് നന്ദി അറിയിച്ച പാകിസ്താൻ, ഇസ്ലാമാബാദിൽ നടക്കുന്ന രണ്ടാംഘട്ട ചർച്ചകളിൽ ശാശ്വത പരിഹാരം ഉണ്ടാകുമെന്ന പ്രതീക്ഷയിലാണ്. സമയപരിധി നിശ്ചയിക്കാതെയുള്ള ഈ വെടിനിർത്തൽ നീട്ടിനൽകൽ മേഖലയിലെ സംഘർഷാവസ്ഥയ്ക്ക് താൽക്കാലിക ആശ്വാസം നൽകുന്നുണ്ട്.