ബെംഗളൂരുവിന്റെ കിരീടവേട്ട; തുടർച്ചയായ രണ്ടാം തവണയും ഐപിഎൽ ചാമ്പ്യന്മാരായി ആർസിബി

അഹമ്മദാബാദ്: ഇന്ത്യൻ പ്രീമിയർ ലീഗിൽ (IPL 2026) ചരിത്രം ആവർത്തിച്ച് റോയൽ ചലഞ്ചേഴ്‌സ് ബെംഗളൂരുവിന് തുടർച്ചയായ രണ്ടാം കിരീടം. അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ നടന്ന ആവേശകരമായ ഫൈനൽ പോരാട്ടത്തിൽ ഗുജറാത്ത് ടൈറ്റൻസിനെ അഞ്ച് വിക്കറ്റുകൾക്ക് തകർത്താണ് രജത് പാട്ടിദാറും സംഘവും വീണ്ടും ചാമ്പ്യന്മാരായത്.

കിങ് കോഹ്‌ലിയുടെ അവിസ്മരണീയമായ ഒറ്റയാൾ പ്രകടനമാണ് ആർസിബിയെ വിജയതീരത്ത് എത്തിച്ചത്. 42 പന്തുകളിൽ നിന്ന് 9 ബൗണ്ടറികളും 3 സിക്സറുകളും അടക്കം പുറത്താകാതെ 75 റൺസാണ് കോഹ്‌ലി അടിച്ചുകൂട്ടിയത്.

ഗുജറാത്ത് ഉയർത്തിയ 156 റൺസ് വിജയലക്ഷ്യം പിന്തുടർന്ന ആർസിബിക്ക് ഓപ്പണർ വെങ്കടേഷ് അയ്യരും വെടിക്കെട്ട് തുടക്കമാണ് നൽകിയത്.

16 പന്തിൽ നിന്ന് രണ്ട് സിക്സറുകളും നാല് ബൗണ്ടറികളും ഉൾപ്പെടെ 32 റൺസ് അയ്യർ നേടി. ടിം ഡേവിഡ് (24), നായകൻ രജത് പാട്ടിദാർ (15), ജിതേഷ് ശർമ (പുറത്താകാതെ 11) എന്നിവരും ബാറ്റിങ്ങിൽ തങ്ങളുടെ പങ്ക് ഭംഗിയാക്കി. ബാറ്റിംഗിനൊപ്പം തന്നെ ആർസിബിയുടെ ബൗളിംഗ് നിരയും ഫൈനലിൽ തിളങ്ങി. നാല് ഓവറിൽ 27 റൺസ് മാത്രം വഴങ്ങി മൂന്ന് വിക്കറ്റുകൾ വീഴ്ത്തിയ റാസിഖ് സലാമിന്റെ പ്രകടനമാണ് ഗുജറാത്തിനെ തകർത്തത്. ഭുവനേശ്വർ കുമാറും ജോഷ് ഹേസൽവുഡും രണ്ട് വിക്കറ്റുകൾ വീതം വീഴ്ത്തി പിന്തുണ നൽകി.

നേരത്തെ, ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഗുജറാത്ത് ടൈറ്റൻസിന് തുടക്കത്തിലേ പിഴച്ചിരുന്നു. ഫോമിലുള്ള ഓപ്പണർമാരായ സായ് സുദർശനും (12) നായകൻ ശുഭ്മാൻ ഗില്ലും (10) അതിവേഗം മടങ്ങിയതോടെ ഗുജറാത്ത് കടുത്ത സമ്മർദ്ദത്തിലായി. എന്നാൽ 37 പന്തിൽ 50 റൺസ് നേടിയ വാഷിങ്ടൺ സുന്ദറിന്റെ അർദ്ധസെഞ്ച്വറി പ്രകടനമാണ് ഗുജറാത്തിനെ നിശ്ചിത 20 ഓവറിൽ 8 വിക്കറ്റ് നഷ്ടത്തിൽ 155 റൺസ് എന്ന ഭേദപ്പെട്ട നിലയിലെത്തിച്ചത്. എങ്കിലും ആർസിബിയുടെ ശക്തമായ ബാറ്റിംഗ് നിരയ്ക്ക് മുന്നിൽ ഈ സ്കോർ പ്രതിരോധിക്കാൻ ഗുജറാത്ത് ബൗളർമാർക്കായില്ല.