പുതിയ ജി.എസ്.ടി നിരക്ക് ഇന്നുമുതൽ; 413 ഉത്പന്നങ്ങൾക്ക് വിലകുറയും

ന്യൂഡൽഹി: ഇന്ത്യയിലെ ചരക്ക്-സേവന നികുതി (ജി.എസ്.ടി.) ചരിത്രത്തിലെ ഏറ്റവും വലിയ പരിഷ്കരണം ഇന്ന് മുതൽ പ്രാബല്യത്തിൽ വന്നു. 12%, 28% എന്നിങ്ങനെയുണ്ടായിരുന്ന സ്ലാബുകൾ ഒഴിവാക്കി 5%, 18% എന്നിങ്ങനെ രണ്ടായി ചുരുക്കിയതോടെ 90 ശതമാനം ഉത്പന്നങ്ങളുടെയും വില കുറയും. ആഡംബര വസ്തുക്കൾ, പുകയില, സിഗരറ്റ്, ലോട്ടറി തുടങ്ങിയവക്ക് 40 ശതമാനം ഉയർന്ന നിരക്ക് ചുമത്തും. 413 ഉത്പന്നങ്ങളുടെ വില കുറയും. ഈ മാറ്റങ്ങൾ വഴി സർക്കാരിന് 48,000 കോടി രൂപയുടെ വരുമാന നഷ്ടം ഉണ്ടാകുമെന്നാണ് കണക്കാക്കുന്നത്.

ഇടത്തരം വാഹനങ്ങളുടെ ജി.എസ്.ടി. 18 ശതമാനമായി കുറച്ചതോടെ വാഹനങ്ങളുടെ വിലയും കുറയും. ഈ വിലക്കുറവ് പൂർണമായും ഉപഭോക്താക്കൾക്ക് കൈമാറാൻ വാഹന നിർമ്മാതാക്കൾ തയ്യാറായിട്ടുണ്ട്. ലൈഫ് ഇൻഷുറൻസ്, ആരോഗ്യ ഇൻഷുറൻസ്, ജനറൽ ഇൻഷുറൻസ് പോളിസികൾ, 33 ജീവൻരക്ഷാ മരുന്നുകൾ എന്നിവയുടെ ജി.എസ്.ടി. ഒഴിവാക്കിയിട്ടുണ്ട്. ഇന്ത്യൻ റെയിൽവേയുടെ റെയിൽനീർ കുപ്പിവെള്ളത്തിന്റെ വിലയിൽ ഒരു രൂപയുടെ കുറവ് പ്രഖ്യാപിച്ചിട്ടുണ്ട്.

പുതിയ വിലവിവരങ്ങൾ എല്ലാ ഉത്പന്നങ്ങളിലും ഇന്ന് മുതൽ പ്രദർശിപ്പിക്കും. വിലകുറയും (പുതിയ നിരക്ക് %)- 5% - ഫീഡിങ്‌ ബോട്ടിൽ, കുട്ടികൾക്കുള്ള നാപ്‌കിൻ, ക്ളിനിക്കൽ ഡയപ്പർ, തുന്നൽയന്ത്രവും ഭാഗങ്ങളും, വസ്‌ത്രങ്ങൾ,(2500 രൂപയിൽ താഴെ), ജൈവകീടനാശിനികൾ, 0% - മാപ്പ്‌, ചാർട്ട്‌, ഗ്ലോബ്‌, പെൻസിൽ, ഷാർപ്പർ, നോട്ടുബുക്കുകൾ, ആരോഗ്യ ഇൻഷുറൻസ്, ലൈഫ്‌ ഇൻഷുറൻസ്‌, 18% - എസി, എൽഇഡി, എൽസിഡി ടിവികൾ(32ഇഞ്ചിന്‌ മുകളിൽ), മോണിറ്റർ, ഡിഷ്‌ വാഷർ, ഗ്രാനൈറ്റ്, സിമന്റ്, 1200 സിസി വരെയുള്ള പെട്രോൾ, സിഎൻജി കാറുകൾ, ഡീസൽ കാറുകൾ (1500 സിസിവരെ), മുച്ചക്ര വാഹനങ്ങൾ, ഇരുചക്രവാഹനങ്ങൾ (350സിസിക്ക്‌ താഴെ). വില കൂടും- 40% - പുകയില, പാൻമസാല, ആഡംബര വാഹനങ്ങൾ, 20 ലക്ഷം മുതൽ 40 ലക്ഷം രൂപ വരെ വിലയുള്ള നാലുചക്ര ഇലക്ട്രിക് വാഹനങ്ങൾ.