മാറ്റമില്ലാതെ സ്വർണവില; മൂന്ന് ദിവസമായി വിപണിയിൽ ഒരേ നിരക്ക്

കൊച്ചി: സംസ്ഥാനത്ത് സ്വർണ്ണവില മാറ്റമില്ലാതെ തുടരുന്നു. തുടർച്ചയായ മൂന്നാം ദിവസവും 22 ക്യാരറ്റ് സ്വർണ്ണത്തിന് ഗ്രാമിന് 14,320 രൂപയും പവന് 1,14,560 രൂപയുമാണ് ഇന്നത്തെ വിപണി നിരക്ക്. ജൂൺ ഒന്നിന് രേഖപ്പെടുത്തിയ ഇതേ വിലയിൽ തന്നെയാണ് സംസ്ഥാനത്ത് നിലവിൽ സ്വർണ്ണ വ്യാപാരം പുരോഗമിക്കുന്നത്. കഴിഞ്ഞ മാസങ്ങളിലെ എക്കാലത്തെയും ഉയർന്ന റെക്കോർഡുകളിൽ നിന്ന് നേരിയ ആശ്വാസം നൽകുന്ന ഇടിവിലാണ് വിപണി തുടരുന്നതെങ്കിലും നിലവിലെ നിരക്ക് ഉയർന്ന തലത്തിൽ തന്നെയാണ്. സ്വർണ്ണത്തോടൊപ്പം സംസ്ഥാനത്ത് വെള്ളി വിലയും മാറ്റമില്ലാതെ തുടരുകയാണ്. ഒരു ഗ്രാം വെള്ളിയ്ക്ക് 280 രൂപയും 10 ഗ്രാമിന് 2,800 രൂപയുമാണ് ഇന്നത്തെ നിരക്ക്.

അതേസമയം, 22 ക്യാരറ്റ് നിരക്കിൽ മാറ്റമില്ലെങ്കിലും 18 ക്യാരറ്റ് സ്വർണ്ണവിലയിൽ ഗ്രാമിന് 65 രൂപയുടെ നേരിയ വർദ്ധനവ് ഇന്ന് രേഖപ്പെടുത്തിയിട്ടുണ്ട്. ഇന്നലെ ഗ്രാമിന് 11,765 രൂപയായിരുന്ന 18 ക്യാരറ്റ് സ്വർണ്ണത്തിന് ഇന്ന് 11,830 രൂപയാണ് വിപണി നിരക്ക്. ജനുവരി 29-ന് രേഖപ്പെടുത്തിയ പവന് 1,31,160 രൂപ എന്ന എക്കാലത്തെയും ഉയർന്ന റെക്കോർഡ് നിരക്കിൽ നിന്നും ഇടിഞ്ഞതിന് ശേഷമാണ് സ്വർണ്ണവില ഇപ്പോൾ ഒരു സ്ഥിരതയാർന്ന ഉയർന്ന തലത്തിൽ തുടരുന്നത്.

നിലവിലെ സ്വർണ്ണവില ഇത്രയും ഉയർന്ന നിരക്കിൽ തുടരുന്നതിനും വിപണിയിൽ സ്ഥിരത പ്രകടമാകുന്നതിനും പിന്നിൽ പല നിർണ്ണായക സാമ്പത്തിക ഘടകങ്ങളുണ്ട്. അമേരിക്കൻ ഫെഡറൽ റിസർവ്വിന്റെ പലിശനിരക്ക് സംബന്ധിച്ച തീരുമാനങ്ങളും പണപ്പെരുപ്പ സൂചികകളും ആഗോളതലത്തിൽ ഡോളറിന്റെ മൂല്യത്തെ സ്വാധീനിക്കുന്നതാണ് ഇതിൽ പ്രധാനം. ഡോളർ സൂചികയിലുണ്ടാകുന്ന നേരിയ വ്യതിയാനങ്ങൾ നിക്ഷേപകരെ ഏറ്റവും സുരക്ഷിത നിക്ഷേപമായ സ്വർണ്ണത്തിലേക്ക് ആകർഷിക്കുന്നതും ആഗോള വിപണിയിലെ വിലയെയും തുടർന്ന് ആഭ്യന്തര വിപണിയെയും ശക്തമായി സ്വാധീനിക്കുന്നുണ്ട്.