മൈസൂരുവിലേക്ക് സ്ലീപ്പറില്‍ പറക്കാം;കോഴിക്കോട്ടേക്ക് ഫ്ലൈ ബസ് ,കെ.എസ്.ആര്‍.ടി.സിയുടെ പുതിയ അങ്കം

യാത്രക്കാർക്കായി സർപ്രൈസ് നീക്കങ്ങളുമായി കർണാടക ആർടിസി കേരളത്തിലേക്ക് കൂടുതൽ സർവീസുകൾ വ്യാപിപ്പിക്കുന്നു. മൈസൂരുവിൽ നിന്ന് കോട്ടയത്തേക്ക് പുതിയ 'പല്ലക്കി' നോൺ എസി സ്ലീപ്പർ ബസുകൾ ഓടിത്തുടങ്ങിയതാണ് ഇതിൽ പ്രധാനപ്പെട്ട ഒന്ന്. രാത്രി യാത്രക്കാർക്ക് സുഖകരമായ ഉറക്കം ഉറപ്പാക്കുന്ന ഈ ബസ് മൈസൂരുവിൽ നിന്ന് വൈകിട്ട് 6.30-ന് പുറപ്പെട്ട് ബത്തേരിയും കോഴിക്കോടും കടന്ന് പുലർച്ചെ 5.15-ന് കോട്ടയത്തെത്തും. 1,150 രൂപയ്ക്ക് ലഭിക്കുന്ന ഈ സ്ലീപ്പർ സൗകര്യം ദീർഘദൂര യാത്രക്കാർക്ക് വലിയ ആശ്വാസമാകും.

എന്നാൽ ഇതിലും വലിയൊരു പദ്ധതി അണിയറയിൽ ഒരുങ്ങുന്നുണ്ട്. ബെംഗളൂരു കെംപെഗൗഡ വിമാനത്താവളത്തിൽ ഇറങ്ങുന്ന കോഴിക്കോട്ടുകാർക്ക് ഇനി ടാക്സികളെയോ സ്വകാര്യ ബസുകളെയോ തേടി അലയേണ്ടി വരില്ല. വിമാനത്താവളത്തിൽ നിന്ന് നേരിട്ട് കോഴിക്കോട്ടേക്ക് മൈസൂരു വഴി 'ഫ്ലൈ ബസ്' സർവീസ് ആരംഭിക്കാനുള്ള ഒരുക്കത്തിലാണ് കർണാടക ട്രാൻസ്പോർട്ട്. നിലവിൽ മൈസൂരുവിനും മടിക്കേരിക്കുമൊക്കെയുള്ള വോൾവോ എസി ഫ്ലൈ ബസുകൾക്ക് ലഭിക്കുന്ന വൻ സ്വീകാര്യതയാണ് കോഴിക്കോട്ടേക്കും ഈ ആഡംബര സൗകര്യം എത്തിക്കാൻ അധികൃതരെ പ്രേരിപ്പിച്ചത്. സ്വകാര്യ ബസുകൾ വാഴുന്ന ഈ റൂട്ടിൽ സർക്കാർ ബസുകളുടെ വരവ് വരും ദിവസങ്ങളിൽ വലിയ മാറ്റങ്ങൾക്കായിരിക്കും വഴിവെക്കുക.