ഇന്നസൻ്റ് സിനിമയിലെ നാടൻ പാട്ട് പുറത്തിറങ്ങി

കൊച്ചി: സതീഷ് തൻവി സംവിധാനം ചെയ്യുന്ന *ഇന്നസൻ്റ്* എന്ന സിനിമയിലെ നാടൻ പാട്ടിന്റെ ലിറിക്കൽ വീഡിയോ പുറത്തിറങ്ങി. *അമ്പമ്പോ... അഞ്ചനമണിക്കട്ടി... ലമ്മേ നല്ല പഞ്ഞണിത്തേർ മെത്തമേ...* എന്ന വരികളോടെ ഏറെ പ്രചാരം നേടിയിട്ടുള്ള ഈ നാടൻ പാട്ട്, പുതിയ ഓർക്കസ്ട്രയുടെ അകമ്പടിയോടെയാണ് ചിത്രത്തിൽ ഉൾപ്പെടുത്തിയിരിക്കുന്നത്. എന്നാൽ, പാട്ടിന്റെ തനിമ ഒട്ടും നഷ്ടപ്പെടാതെയാണിത് അവതരിപ്പിച്ചിരിക്കുന്നത്.

സംഗീതസംവിധാനം ജയ് സ്റ്റെല്ലറിന്റേതാണ്. രേഷ്മ രാഘവേന്ദ്രയും സംഘവും ചേർന്നാണ് ഗാനം ആലപിച്ചിരിക്കുന്നത്. ചിത്രത്തിന്റെ റിലീസിന് മുന്നോടിയായുള്ള പ്രമോഷന്റെ ഭാഗമായി ഗാനത്തെ ഇപ്പോൾ പുറത്തുവിട്ടിരിക്കുകയാണ്.

എലമെൻ്റ്സ് ഓഫ് സിനിമയുടെ ബാനറിൽ ശ്രീരാജ് എ.ഡി. നിർമ്മിക്കുന്ന *ഇന്നസൻ്റ്* എന്ന ചിത്രത്തിന്റെ എക്സിക്യൂട്ടീവ് പ്രൊഡ്യൂസേഴ്സ് അജയ് വാസുദേവ്, ജി. മാർത്താണ്ഡൻ, ഡിക്സൺ പൊടുത്താസ് എന്നിവരാണ്.

സർക്കാർ ജീവനക്കാരനായ വിനോദിന്റെ ജീവിതകഥയാണ് സിനിമയുടെ പ്രമേയം. കരുനാഗപ്പള്ളിയിൽ നിന്ന് തിരുവനന്തപുരത്തേക്കുള്ള യാത്രയ്ക്കിടയിൽ അരങ്ങേറുന്ന സംഭവങ്ങളെയാണ് തികഞ്ഞ സറ്റയറായി സിനിമ അവതരിപ്പിക്കുന്നത്. നമ്മുടെ ദൈനംദിന ജീവിതത്തിൽ കാണുകയും കേൾക്കുകയും ചെയ്യുന്ന വിഷയങ്ങളാണ് കഥയിൽ നിറഞ്ഞിരിക്കുന്നത്.

അൽത്താഫ് സലിമാണ് വിനോദിന്റെ കഥാപാത്രത്തെ അവതരിപ്പിക്കുന്നത്. അൽത്താഫിന്റെ നൈസർഗ്ഗികമായ നർമ്മസിദ്ധി ഈ വേഷത്തിനും അനുയോജ്യമാകുമെന്ന് ചിത്രത്തിന്റെ നിർമ്മാണ പ്രവർത്തകർ  വ്യക്തമാക്കി. ജോമോൻ ജ്യോതിറും അനാർക്കലി മരക്കാറും മറ്റു പ്രധാന കഥാപാത്രങ്ങളെ അവതരിപ്പിക്കുന്നു. അസീസ് നെടുമങ്ങാട്, റിയാസ് നർമ്മകല, അന്നാ പ്രസാദ്, ജോളി ചിറയത്ത്, ആദിനാട് ശശി തുടങ്ങിയവർ കൂടാതെ നിരവധി പുതുമുഖങ്ങളും ചിത്രത്തിൽ അണിനിരക്കുന്നു.

ഷിഹാബ് കരുനാഗപ്പള്ളിയുടെ കഥയെ അടിസ്ഥാനമാക്കി ഷിഹാബ് കരുനാഗപ്പള്ളി, സർജി വിജയൻ, സതീഷ് തൻവി എന്നിവർ തിരക്കഥ രചിക്കുന്നു. വിനായക് ശശികുമാർ എഴുതിയ എട്ട് ഗാനങ്ങൾക്കും ജയ് സ്റ്റെല്ലറാണ് സംഗീതം നൽകുന്നത്.

ഛായാഗ്രഹണം നിഖിൽ എസ്. പ്രവീൺ, എഡിറ്റിംഗ് റിയാസ്, കലാസംവിധാനം മധു രാഘവൻ, മേക്കപ്പ് സുധി ഗോപിനാഥ്, വേഷാലങ്കാരം ഡോണ മറിയം ജോസഫ്, ചീഫ് അസോസിയേറ്റ് ഡയറക്ടർ സുമി ലാൽ സുബ്രഹ്മണ്യൻ, പ്രൊഡക്ഷൻ കൺട്രോളർ സുരേഷ് മിത്രക്കരി, പി.ആർ.ഒ വാഴൂർ ജോസ് എന്നിവരാണ് സംഘത്തിൽ പ്രധാനമായും പ്രവർത്തിച്ചിരിക്കുന്നത്.

കൊച്ചി, തിരുവനന്തപുരം, കരുനാഗപ്പള്ളി, ആറ്റിങ്ങൽ എന്നിവിടങ്ങളിലായി ചിത്രീകരണം പൂർത്തിയായ *ഇന്നസൻ്റ്*ന്റെ പോസ്റ്റ് പ്രൊഡക്ഷൻ പ്രവർത്തനങ്ങൾ അവസാനഘട്ടത്തിലാണ്. ചിത്രം സെഞ്ചുറി ഫിലിംസ് തിയറ്ററുകളിലെത്തിക്കും.