തിരഞ്ഞെടുപ്പ് തിരിച്ചടി അപ്രതീക്ഷിതം; ഇടതുപക്ഷം ദുർബലപ്പെടുന്നത് നാടിന് അപകടമെന്ന് ഇ.പി. ജയരാജൻ

നിയമസഭാ തിരഞ്ഞെടുപ്പിൽ ഇടതുമുന്നണിക്കുണ്ടായ പരാജയം അപ്രതീക്ഷിതമാണെന്ന് സി.പി.എം നേതാവ് ഇ.പി. ജയരാജൻ. പത്ത് വർഷത്തിനിടെ കേരളം കൈവരിച്ച വികസന മുന്നേറ്റങ്ങൾ കണക്കിലെടുക്കുമ്പോൾ അനുകൂലമായ ജനവിധിയാണ് പ്രതീക്ഷിച്ചിരുന്നതെന്നും എന്നാൽ ഫലം വന്നപ്പോൾ അത് തികച്ചും വ്യത്യസ്തമായിപ്പോയെന്നും അദ്ദേഹം കണ്ണൂരിൽ മാധ്യമങ്ങളോട് പറഞ്ഞു. ഇടതുപക്ഷം ദുർബലപ്പെടുന്നത് കേരളത്തിന്റെ തകർച്ചയ്ക്ക് കാരണമാകുമെന്നും ലോകത്തിന്റെ ഇന്നത്തെ പ്രതിസന്ധികൾക്ക് പിന്നിൽ ഇടതുപക്ഷത്തിന്റെ ശോഷണമാണെന്നും അദ്ദേഹം ഓർമ്മിപ്പിച്ചു. വലതുപക്ഷ തീവ്രവാദം ലോകത്ത് നാശം വിതയ്ക്കുകയാണെന്നും ജനങ്ങളുടെ താൽപ്പര്യങ്ങൾ സംരക്ഷിക്കാൻ ഇടതുപക്ഷത്തെ ശക്തിപ്പെടുത്തണമെന്നും ജയരാജൻ കൂട്ടിച്ചേർത്തു.

മാധ്യമങ്ങളും സോഷ്യൽ മീഡിയയും ഉപയോഗിച്ച് വലതുപക്ഷ ശക്തികൾ ശക്തമായ ആക്രമണമാണ് സർക്കാരിനെതിരെ നടത്തുന്നതെന്ന് ജയരാജൻ വിമർശിച്ചു. 102 സീറ്റുകൾ ലഭിച്ചിട്ടും ഒരു മുഖ്യമന്ത്രിയെ തിരഞ്ഞെടുക്കാൻ പോലും യു.ഡി.എഫിന് സാധിക്കുന്നില്ലെന്നും ഇത് അവരുടെ തകർച്ചയുടെ ആഴമാണ് കാണിക്കുന്നതെന്നും അദ്ദേഹം പരിഹസിച്ചു. ബി.ജെ.പി മൂന്ന് സീറ്റുകൾ നേടിയത് അപകടകരമായ സൂചനയാണെന്നും ഇതിന്റെ ഗൗരവം മനസ്സിലാക്കുന്നതിൽ യു.ഡി.എഫ് പരാജയപ്പെട്ടുവെന്നും ഇ.പി. ജയരാജൻ കുറ്റപ്പെടുത്തി.