പത്ത് വയസുകാരിക്ക് നേരെ ലൈംഗികാതിക്രമം; ട്യൂഷൻ അധ്യാപകനായ 76കാരന് പത്തുവർഷം തടവും പിഴയും

തിരുവനന്തപുരം: പത്ത് വയസുകാരിക്കുനേരെ ലൈംഗികാതിക്രമം നടത്തിയ കേസിൽ ട്യൂഷൻ അധ്യാപകന് പത്തുവർഷം തടവുശിക്ഷ. 10,000 രൂപ പിഴയും ശിക്ഷ വിധിച്ചു.‌ മുട്ടത്തറ വില്ലേജിൽ അംബിക ഭവൻ വീട്ടിൽ‌ ദേവദാസിനെയാണ് (76) തിരുവനന്തപുരം അതിവേഗ പ്രത്യേക കോടതി ജഡ്ജി ആർ.രേഖ ശിക്ഷിച്ചത്. പിഴ‌ത്തുക കുട്ടിക്ക് നൽകണമെന്നും പിഴ അടച്ചില്ലെങ്കിൽ രണ്ടുമാസം കൂടുതൽ തടവ് അനുഭവിക്കണമെന്നും കോടതി ഉത്തരവിട്ടു. 

2023 ഫെബ്രുവരി രണ്ടിനാണ് കേസിനാസ്പദമായ സംഭവം നടന്നത്. ട്യൂഷൻ പഠിപ്പിക്കുന്നതിനിടെ കുട്ടിയുടെ സ്വകാര്യഭാഗത്ത് ദേവദാസ് കടന്നുപിടിക്കുകയായിരുന്നു. ക്ലാസിൽ മറ്റു കുട്ടികൾ ഇല്ലാതിരുന്ന സമയത്തായിരുന്നു സംഭവം. ഭയന്ന കുട്ടി ഇതേക്കുറിച്ച് പുറത്ത് ആരോടും പറഞ്ഞില്ല. പിന്നീട്, കുട്ടി ട്യൂഷൻ ക്ലാസിൽ പോകാൻ വിസമ്മതിച്ചതോടെ വീട്ടുകാർ കാര്യം തിരക്കിയപ്പോഴാണ് വീട്ടുകാരോട് വിവരം പറഞ്ഞത്. വീട്ടുകാർ വിവരം ട്യൂഷൻ സെന്‍ററിന്‍റെ പ്രിൻസിപ്പലിനെ അറിയിച്ചു. തുടർന്ന്, പ്രിൻസിപ്പലും വീട്ടുകാരും ചേർന്ന് പോലീസിനെ അറിയിക്കുകയായിരുന്നു.