പുത്തൻ കരുത്തുമായി ടാറ്റ പഞ്ച് ഇവി ഫെയ്‌സ്‌ലിഫ്റ്റ് വിപണിയിൽ; പ്രാരംഭ വില 9.69 ലക്ഷം രൂപ മുതൽ

ഇന്ത്യയിലെ പ്രമുഖ വാഹന നിർമ്മാതാക്കളായ ടാറ്റ മോട്ടോഴ്‌സ്, ജനപ്രിയ ഇലക്ട്രിക് എസ്‌യുവിയായ പഞ്ച് ഇവിയുടെ ഫെയ്‌സ്‌ലിഫ്റ്റ് പതിപ്പ് പുറത്തിറക്കി. മുംബൈ എക്സ്-ഷോറൂം പ്രകാരം 9.69 ലക്ഷം രൂപ മുതലാണ് വാഹനത്തിന്റെ വില ആരംഭിക്കുന്നത്. ബാറ്ററി വാടകയ്ക്ക് എടുക്കാവുന്ന BaaS (Battery as a Service) പ്രോഗ്രാം വഴി 6.49 ലക്ഷം രൂപയ്ക്കും വാഹനം ലഭ്യമാകും.

പുതിയ പഞ്ച് ഇവി രണ്ട് ബാറ്ററി ഓപ്ഷനുകളിൽ ലഭ്യമാണ്: ലോംഗ് റേഞ്ച് (40kWh): ഒറ്റ ചാർജിൽ 468 കിലോമീറ്റർ വരെ സഞ്ചരിക്കാൻ സാധിക്കും. മീഡിയം റേഞ്ച് (30kWh): നഗരയാത്രകൾക്ക് അനുയോജ്യമായ രീതിയിൽ ക്രമീകരിച്ചിരിക്കുന്നു.

ഫാസ്റ്റ് ചാർജിംഗില്‍ 65kW DC ഫാസ്റ്റ് ചാർജിംഗ് ഉപയോഗിച്ച് വെറും 26 മിനിറ്റിനുള്ളിൽ 20-80 ശതമാനം വരെ ചാർജ് ചെയ്യാം. 15 മിനിറ്റ് ചാർജ് ചെയ്താൽ 135 കിലോമീറ്റർ വരെ സഞ്ചരിക്കാനുള്ള കരുത്ത് ലഭിക്കും. വാഹനത്തിനുള്ളിലും പുറത്തും വലിയ മാറ്റങ്ങളാണ് ടാറ്റ വരുത്തിയിരിക്കുന്നത്:

വയർലെസ് ആപ്പിൾ കാർപ്ലേ/ആൻഡ്രോയിഡ് ഓട്ടോ, വോയ്‌സ് അസിസ്റ്റഡ് സൺറൂഫ്, വെന്റിലേറ്റഡ് ഫ്രണ്ട് സീറ്റുകൾ, പുതിയ HVAC പാനൽ, ഡ്യുവൽ ടോൺ ഡാഷ്‌ബോർഡ്. മൂന്ന് ഡ്രൈവ് മോഡുകൾ (ഇക്കോ, സിറ്റി, സ്പോർട്), പാഡിൽ ഷിഫ്റ്ററുകൾ വഴിയുള്ള നാല് റീജൻ (Regen) മോഡുകൾ. പുതുക്കിയ മുൻഭാഗം (Fascia), പുതിയ LED ടെയിൽ ലൈറ്റുകൾ, LED ലൈറ്റ് ബാർ. ഏഴ് ആകർഷകമായ നിറങ്ങളിൽ വാഹനം ലഭ്യമാണ്.