ലൈംഗികാതിക്രമത്തിന് 'മായാമയൂരം' സീരിയൽ പ്രൊഡക്ഷൻ എക്സിക്യൂട്ടീവിനെതിരെ കേസെടുത്തു പോലീസ്

തിരുവനന്തപുരം: ജൂനിയർ ആർട്ടിസ്റ്റ് കോർഡിനേറ്ററെ ലൈംഗികമായി പീഡിപ്പിച്ചെന്ന പരാതിയിൽ ടെലിവിഷൻ സീരിയൽ പ്രൊഡക്ഷൻ എക്‌സിക്യൂട്ടീവിനെതിരെ തിരുവല്ലം പോലീസ് കേസെടുത്തു. ജൂനിയർ ആർട്ടിസ്റ്റ് കോ-ഓർഡിനേറ്റർ നൽകിയ പരാതിയിൽ മായാമയൂരം എന്ന സീരിയലിൻ്റെ ഷൂട്ടിങ്ങിനിടെ തിരുവനന്തപുരം ചിത്രാഞ്ജലി സ്റ്റുഡിയോയിൽ വെച്ച് സീരിയൽ പ്രൊഡക്ഷൻ എക്‌സിക്യൂട്ടീവായ അസീം ഫാസി തന്നോട് മോശമായി പെരുമാറിയെന്ന് യുവതി പരാതിയിൽ പറയുന്നു.

മദ്യലഹരിയിലായിരുന്ന അസീം തന്നെ പിന്നിൽ നിന്ന് പിടികൂടിയതായി യുവതി ആരോപിച്ചു. സംഭവം നിർമ്മാതാവിനെ അറിയിച്ചതിന് ശേഷം അസീം തന്നെ ഫോണിൽ വിളിച്ച് ശല്യം ചെയ്യുന്നത് തുടർന്നെന്നും പരാതിക്കാരി പറയുന്നു. തുടക്കത്തിൽ, അസീമിനെ നിർമ്മാണത്തിൽ നിന്ന് നീക്കം ചെയ്യുമെന്ന് നിർമ്മാതാവ് യുവതിയ്ക്ക് ഉറപ്പുനൽകുകയും അദ്ദേഹത്തെ ഹ്രസ്വകാലത്തേക്ക് സസ്പെൻഡ് ചെയ്യുകയും ചെയ്തു.

എന്നാൽ പിന്നീട് അതേ സീരിയലിൽ തന്നെ അസീം ജോലിയിൽ പ്രവേശിക്കുകയും "അഡ്ജസ്റ്റ്‌മെൻ്റുകൾ"ക്കായി അനുചിതമായ ആവശ്യങ്ങൾ ഉന്നയിച്ചുകൊണ്ട് ഉപദ്രവം തുടർന്നു കൊണ്ടിരുന്നു. ഈ സാഹചര്യത്തിലാണ് യുവതി പോലീസിൽ പരാതിപ്പെട്ടത്

“പരാതിക്കാരിയുടെ മൊഴിയനുസരിച്ച് ഞങ്ങൾ ജനുവരി 9 ന് എഫ്.ഐ.ആർ രജിസ്റ്റർ ചെയ്തു. അന്വേഷണങ്ങൾ നടന്നുകൊണ്ടിരിക്കുകയാണ്. നിലവിൽ സാക്ഷികളുടെ മൊഴി രേഖപ്പെടുത്തുകയാണ്. പ്രതിക്ക് ഇനിയും സമൻസ് അയച്ചിട്ടില്ല,” തിരുവല്ലം പോലീസ് സ്റ്റേഷനിലെ ഒരു ഉദ്യോഗസ്ഥൻ പറഞ്ഞു.

അതേസമയം ജസ്റ്റിസ് ഹേമ കമ്മിറ്റിയുടെ ശുപാർശകൾ അവഗണിച്ച് സെറ്റിൽ ലൈംഗികാതിക്രമം നിലനിൽക്കുന്നുണ്ടെന്നും ജൂനിയർ ആർട്ടിസ്റ്റുകൾ, പ്രത്യേകിച്ച് സ്ത്രീകൾ ഇത്തരം ചുറ്റുപാടുകളിൽ സുരക്ഷിതരല്ലെന്നും ഇര ആരോപിച്ചു. പല സെറ്റുകളിലും സ്ത്രീകളെ "അഡ്ജസ്റ്റ്‌മെൻ്റിന്" നിർബന്ധിക്കുന്ന സംസ്കാരം തുടരുകയാണെന്നും ജൂനിയർ ആർട്ടിസ്റ്റുകളോട് ജോലി ഏൽപ്പിക്കുന്നതിന് മുമ്പ് ആരെയെങ്കിലും ഏർപ്പെടുത്താൻ കഴിയുമോ എന്ന് പലപ്പോഴും ചോദിക്കാറുണ്ടെന്നും യുവതി വെളിപ്പെടുത്തി.

ഈ ആവശ്യങ്ങൾ നിർമ്മാതാക്കളും സംവിധായകരും കൂടാതെ കൺട്രോളർമാരുമാണ് ഉന്നയിക്കുന്നതെന്നും പരാതിക്കാരി കൂട്ടിച്ചേർത്തു.