ഈസ്റ്റർ ദിനത്തിലെ ജെഇഇ പരീക്ഷയിൽ മാറ്റം; പരീക്ഷാ തീയതി മാറാൻ വിദ്യാർത്ഥികൾക്ക് ഇമെയിൽ അയക്കാം

കൊച്ചി: ഈസ്റ്റർ ദിനത്തിലെ ജെഇഇ മെയിൻ (JEE Main) പരീക്ഷാ തീയതിയുമായി ബന്ധപ്പെട്ട ആശങ്കകൾക്ക് പരിഹാരം. ഏപ്രിൽ 5-ന് നിശ്ചയിച്ചിരുന്ന പരീക്ഷ എഴുതാൻ സാധിക്കാത്ത വിദ്യാർത്ഥികൾക്ക് മറ്റൊരു ദിവസം അവസരം നൽകുമെന്ന് കേന്ദ്രമന്ത്രി സുരേഷ് ഗോപി അറിയിച്ചു. കേന്ദ്ര വിദ്യാഭ്യാസ മന്ത്രിയിൽ നിന്ന് ഇത് സംബന്ധിച്ച ഉറപ്പ് ലഭിച്ചതായും അദ്ദേഹം വ്യക്തമാക്കി.

ഈസ്റ്റർ പ്രമാണിച്ച് ഏപ്രിൽ 5-ലെ പരീക്ഷാ തീയതിയിൽ മാറ്റം ആഗ്രഹിക്കുന്ന വിദ്യാർത്ഥികൾക്ക് പ്രത്യേക അവസരം നൽകാനാണ് തീരുമാനം. നാളെയാണ് അപേക്ഷ സമർപ്പിക്കേണ്ട അവസാന തീയതി എന്നതിനാൽ വിദ്യാർത്ഥികൾ എത്രയും വേഗം നടപടികൾ പൂർത്തിയാക്കേണ്ടതുണ്ട്.

അപേക്ഷിക്കേണ്ട വിധം:

തീയതി മാറ്റം ആഗ്രഹിക്കുന്നവർ jeemain.query@nta.ac.in എന്ന ഇമെയിലിലേക്ക് അടിയന്തരമായി സന്ദേശം അയക്കുക.

നൽകേണ്ട വിവരങ്ങൾ: വിദ്യാർത്ഥിയുടെ പേര്, ആപ്ലിക്കേഷൻ നമ്പർ, മാറ്റം ആഗ്രഹിക്കുന്നതിനുള്ള കാരണം എന്നിവ ഇമെയിലിൽ വ്യക്തമാക്കണം.

ക്രിസ്ത്യൻ വിശ്വാസികളുടെ പ്രധാന ആഘോഷമായ ഈസ്റ്റർ ദിനത്തിൽ പരീക്ഷ വരുന്നത് വിദ്യാർത്ഥികൾക്കും രക്ഷിതാക്കൾക്കും ബുദ്ധിമുട്ടുണ്ടാക്കുമെന്ന പരാതിയെത്തുടർന്നാണ് കേന്ദ്രമന്ത്രി സുരേഷ് ഗോപി വിഷയത്തിൽ ഇടപെട്ടത്. കേരളത്തിലെ ഉൾപ്പെടെയുള്ള വിദ്യാർത്ഥികളുടെ ഈ ആവശ്യം പരിഗണിച്ച് മറ്റൊരു ദിവസം പരീക്ഷ എഴുതാനുള്ള സൗകര്യം നാഷണൽ ടെസ്റ്റിംഗ് ഏജൻസി  ഒരുക്കും.