ആരോഗ്യവും സൗന്ദര്യവും ഒരുപോലെ സംരക്ഷിക്കാൻ 'ഹെൽത്തി ലഡു'; ശരീരഭാരം കുറയ്ക്കാനും മുടി വളരാനും ഉത്തമം

ആരോഗ്യവും സൗന്ദര്യവും ഒരുപോലെ നിലനിർത്താൻ ആഗ്രഹിക്കുന്നവർക്കായി വീട്ടിൽ തന്നെ എളുപ്പത്തിൽ തയ്യാറാക്കാവുന്ന ഒരു ഹെൽത്തി ലഡു പരിചയപ്പെടാം. വിലകൂടിയ കൃത്രിമ ഉൽപ്പന്നങ്ങളെ ആശ്രയിക്കാതെ, പ്രകൃതിദത്തമായ ചേരുവകൾ ഉപയോഗിച്ച് തയ്യാറാക്കുന്ന ഈ വിഭവം ശാരീരികക്ഷമത വർദ്ധിപ്പിക്കാൻ സഹായിക്കുന്നു.

അമിതവണ്ണം കുറയ്ക്കാനും മുടിയുടെ ആരോഗ്യം മെച്ചപ്പെടുത്താനും സഹായിക്കുന്ന ഈ ലഡു പ്രായഭേദമന്യേ എല്ലാവർക്കും കഴിക്കാവുന്നതാണ്. ദിവസവും ഒന്നു വീതം കഴിക്കുന്നത് വെറും ഒരു മാസം കൊണ്ട് പ്രകടമായ മാറ്റം നൽകുമെന്ന് ആരോഗ്യ വിദഗ്ധർ ചൂണ്ടിക്കാട്ടുന്നു.

ആവശ്യമായ ചേരുവകൾ:

ഈന്തപ്പഴം (കുരു കളഞ്ഞത്): 250 ഗ്രാം

നെയ്യ് അല്ലെങ്കിൽ ഒലീവ് ഓയിൽ: ആവശ്യത്തിന്

നട്‌സ്: ബദാം, അണ്ടിപ്പരിപ്പ്, പിസ്ത (കാൽ കപ്പ് വീതം), വാൾനട്ട്, കപ്പലണ്ടി (2 ടേബിൾ സ്പൂൺ വീതം)

വിത്തുകൾ: തണ്ണിമത്തൻ വിത്ത്, പംകിൻ വിത്ത്, വെള്ള എള്ള് (കാൽ കപ്പ് വീതം), പോപ്പി സീഡ് (2 ടീസ്പൂൺ)

മറ്റ് ചേരുവകൾ: ചിരകിയ തേങ്ങ (2 ടേബിൾ സ്പൂൺ), ജാതിക്കപ്പൊടി (1 ടേബിൾ സ്പൂൺ)

തയ്യാറാക്കുന്ന വിധം:

ഒരു പാത്രത്തിൽ ഒരു ടീസ്പൂൺ നെയ്യ് ചൂടാക്കി ഈന്തപ്പഴം ചേർക്കുക. ചെറിയ തീയിൽ അഞ്ച് മിനിട്ടോളം ഇളക്കി മൃദുവായ ശേഷം മറ്റൊരു പാത്രത്തിലേക്ക് മാറ്റുക.

അതേ പാത്രത്തിൽ വീണ്ടും നെയ്യൊഴിച്ച് ബദാം, അണ്ടിപ്പരിപ്പ്, പിസ്ത, വാൾനട്ട്, കപ്പലണ്ടി എന്നിവ ചേർത്ത് മൂന്ന് മിനിറ്റ് നന്നായി വറുത്തെടുക്കുക.

മറ്റൊരു പാത്രത്തിൽ നെയ്യ് ചൂടാക്കി തണ്ണിമത്തൻ വിത്ത്, പംകിൻ വിത്ത്, വെള്ള എള്ള്, പോപ്പി സീഡ്, തേങ്ങ ചിരകിയത് എന്നിവ ചേർത്ത് ഇളക്കുക.

വറുത്തെടുത്ത എല്ലാ ചേരുവകളും ഒരു വലിയ പാത്രത്തിലേക്ക് മാറ്റി അതിലേക്ക് ഈന്തപ്പഴവും ജാതിക്കപ്പൊടിയും ചേർത്ത് നന്നായി യോജിപ്പിക്കുക.

ചൂടാറുന്നതിന് മുൻപ് തന്നെ ഇത് ലഡുവിന്റെ ആകൃതിയിൽ ഉരുട്ടിയെടുക്കാം.