കാത്തിരിപ്പും പ്രാർഥനകളും വിഫലം: കൊച്ചിയിൽ ഹൃദയം മാറ്റിവെച്ച ദുർഗ കാമി വിട പറഞ്ഞു

കൊച്ചി: ഹൃദയം മാറ്റിവെക്കൽ ശസ്ത്രക്രിയ കഴിഞ്ഞ് എറണാകുളം ജനറൽ ആശുപത്രിയിൽ ചികിത്സയിലായിരുന്ന നേപ്പാൾ സ്വദേശി ദുർഗ കാമി (23) അന്തരിച്ചു. വെള്ളിയാഴ്ച രാത്രി പത്ത് മണിയോടെയായിരുന്നു അന്ത്യം. ശ്വാസകോശത്തിന്റെ പ്രവർത്തനം നിലച്ചതിന് പിന്നാലെ ഉണ്ടായ ഹൃദയസ്തംഭനമാണ് മരണകാരണമെന്ന് ആശുപത്രി അധികൃതർ അറിയിച്ചു.

ഇന്ത്യയിലാദ്യമായി ഒരു ജില്ലാ ആശുപത്രിയിൽ (എറണാകുളം ജനറൽ ആശുപത്രി) നടന്ന ഹൃദയം മാറ്റിവെക്കൽ ശസ്ത്രക്രിയ എന്ന നിലയിൽ ദുർഗയുടെ ചികിത്സ ഏറെ ശ്രദ്ധിക്കപ്പെട്ടിരുന്നു. ഡിസംബർ 22-നായിരുന്നു ശസ്ത്രക്രിയ നടന്നത്.

മസ്തിഷ്ക മരണം സംഭവിച്ച കൊല്ലം സ്വദേശി ഷിബുവിന്റെ ഹൃദയമാണ് ദുർഗയ്ക്ക് പുതുജീവൻ നൽകാനായി എത്തിച്ചത്. തിരുവനന്തപുരത്തുനിന്ന് മുഖ്യമന്ത്രിയുടെ നിർദ്ദേശപ്രകാരം ആഭ്യന്തര വകുപ്പിന്റെ ഹെലികോപ്റ്ററിലാണ് ഹൃദയം കൊച്ചിയിലെത്തിച്ചത്.

നേപ്പാളിലെ അനാഥാലയത്തിൽ വളർന്ന ദുർഗ, ഇന്ത്യയിൽ ഹൃദയം മാറ്റിവെക്കൽ ശസ്ത്രക്രിയയ്ക്കായി വലിയ നിയമപോരാട്ടം തന്നെ നടത്തിയിരുന്നു. തുടർന്ന് ആരോഗ്യവകുപ്പ് മന്ത്രി വീണാ ജോർജിന്റെ നേതൃത്വത്തിൽ സർക്കാർ വിപുലമായ സൗകര്യങ്ങളാണ് ഒരുക്കിയത്.

ശസ്ത്രക്രിയയ്ക്ക് ശേഷം തീവ്രപരിചരണ വിഭാഗത്തിൽ ചികിത്സയിൽ കഴിഞ്ഞുവരികയായിരുന്നു ദുർഗ. ശസ്ത്രക്രിയ വിജയകരമായിരുന്നുവെങ്കിലും പിന്നീട് ശ്വാസകോശത്തിലുണ്ടായ അണുബാധയും ആരോഗ്യപ്രശ്നങ്ങളുമാണ് മരണത്തിലേക്ക് നയിച്ചത്. ഒരു വിദേശ യുവതിയുടെ ജീവൻ രക്ഷിക്കാൻ കേരള സർക്കാർ സംവിധാനങ്ങൾ ഒറ്റക്കെട്ടായി നടത്തിയ പോരാട്ടം ഫലം കാണാതെ പോയതിന്റെ സങ്കടത്തിലാണ് കൊച്ചിയിലെ ആരോഗ്യ പ്രവർത്തകരും നാട്ടുകാരും.