പനി വിട്ടാലും ചുമ മാറുന്നില്ലേ? ജാഗ്രത വേണം; സംസ്ഥാനത്ത് വൈറൽ പനി വ്യാപിക്കുന്നു

തിരുവനന്തപുരം: കേരളത്തിൽ വൈറൽ പനി ബാധിക്കുന്നവരുടെ എണ്ണത്തിൽ വൻ വർദ്ധനവ്. പനി ഭേദമായാലും ആഴ്ചകളോളം നീണ്ടുനിൽക്കുന്ന ചുമ പലരിലും ഗുരുതരമായ ആരോഗ്യപ്രശ്നങ്ങൾക്ക് കാരണമാകുന്നതായി റിപ്പോർട്ടുകൾ വ്യക്തമാക്കുന്നു. ഈ വർഷം ഇതുവരെ സംസ്ഥാനത്ത് ഏകദേശം 2.66 ലക്ഷം പേർക്ക് പനി റിപ്പോർട്ട് ചെയ്തിട്ടുണ്ട്.

പനി വിട്ടാലും വിട്ടുമാറാത്ത ചുമയ്ക്ക് പിന്നിൽ പ്രധാനമായും മൂന്ന് വൈറസുകളാണെന്ന് ആരോഗ്യ വിദഗ്ധർ ചൂണ്ടിക്കാട്ടുന്നു. റെസ്പിറേറ്ററി സിൻസിഷ്യൽ വൈറസ് (RSV), റൈനോ വൈറസ് (Rhino Virus), മെറ്റാന്യൂമോ വൈറസ് (Metapneumo Virus). കൃത്യസമയത്ത് ചികിത്സ തേടിയില്ലെങ്കിൽ ഇത് താഴെ പറയുന്ന ഗുരുതര അവസ്ഥകളിലേക്ക് നയിക്കാം. കോവിഡിന് ശേഷം വൈറൽ ബാധയെത്തുടർന്നുണ്ടാകുന്ന ന്യുമോണിയ കൂടുതൽ സങ്കീർണ്ണമാകുന്നുണ്ട്.

ബ്രോങ്കൈൽ ആസ്മ: ശ്വാസകോശ സംബന്ധമായ വിട്ടുമാറാത്ത അസ്വസ്ഥതകൾക്ക് ഇത് കാരണമാകും. സെക്കൻഡറി ഇൻഫെക്ഷൻ: സ്വയം ചികിത്സ നടത്തുന്നതും ചികിത്സ വൈകിപ്പിക്കുന്നതും ബാക്ടീരിയൽ അണുബാധകൾക്കുംവഴിവെക്കാം.

ശ്രദ്ധിക്കേണ്ട കാര്യങ്ങൾ

തുടക്കത്തിലേ ചികിത്സ: ജലദോഷമോ പനിയോ കണ്ടാലുടൻ ആന്റി-വൈറൽ ചികിത്സ തേടുക.

രോഗനിർണ്ണയം: ചുമ നീണ്ടുനിൽക്കുകയാണെങ്കിൽ എക്സ്റേ, പൾമനറി ഫങ്ഷൻ ടെസ്റ്റ് (PFT) എന്നിവ വഴി രോഗതീവ്രത പരിശോധിക്കണം.

വിദഗ്ധ സഹായം: മൂന്നാഴ്ച പിന്നിട്ടിട്ടും ചുമ മാറുന്നില്ലെങ്കിൽ ഒരു പൾമനോളജിസ്റ്റിനെ (ശ്വാസകോശ രോഗ വിദഗ്ധൻ) നേരിട്ട് കണ്ട് പരിശോധന നടത്തുക.

പ്രതിദിനം ശരാശരി 6,500 പേർ പനി ബാധിച്ച് ആശുപത്രികളിൽ എത്തുന്നുണ്ടെന്നാണ് ആരോഗ്യവകുപ്പിന്റെ കണക്ക്. ലക്ഷണങ്ങൾ കണ്ടാൽ വിശ്രമിക്കാനും ധാരാളം വെള്ളം കുടിക്കാനും ശ്രദ്ധിക്കണം.