വെള്ളം കുടിച്ചാൽ തടി കുറയുമോ? മിഥ്യാധാരണകളും ശാസ്ത്രീയ സത്യങ്ങളും അറിയാം

അമിതഭാരം കുറയ്ക്കാൻ ആഗ്രഹിക്കുന്നവർക്ക് ലഭിക്കുന്ന പ്രധാന ഉപദേശമാണ് ധാരാളം വെള്ളം കുടിക്കുക എന്നത്. എന്നാൽ, വെള്ളം കുടിക്കുന്നത് വഴി മാത്രം ശരീരഭാരം കാര്യമായി കുറയുമെന്നത് ഒരു മിഥ്യാധാരണയാണെന്ന് ആരോഗ്യവിദഗ്ധർ ചൂണ്ടിക്കാട്ടുന്നു. ഇതുമായി ബന്ധപ്പെട്ട ശാസ്ത്രീയ വശങ്ങൾ പരിശോധിക്കാം:

പഠനങ്ങൾ പ്രകാരം, 500 മില്ലിലിറ്റർ വെള്ളം കുടിക്കുമ്പോൾ വിശ്രമവേളയിൽ ശരീരം ഉപയോഗിക്കുന്ന ഊർജ്ജത്തിന്റെ അളവ് 24 ശതമാനം വർദ്ധിച്ചേക്കാം. എന്നാൽ, ഈ ഗുണം വെറും ഒരു മണിക്കൂർ മാത്രമേ നീണ്ടുനിൽക്കൂ. 70 കിലോ ഭാരമുള്ള ഒരാൾ 500 മില്ലിലിറ്റർ വെള്ളം കുടിക്കുമ്പോൾ ഏകദേശം 20 കലോറി മാത്രമാണ് കത്തുന്നത്. ഇത് വെറും ഒരു ബിസ്കറ്റിന്റെ നാലിലൊന്ന് ഭാഗത്തിന് തുല്യം മാത്രമാണ്. തണുത്ത വെള്ളം കുടിക്കുമ്പോൾ ശരീരം ആ വെള്ളത്തെ ശരീരതാപനിലയിലേക്ക് എത്തിക്കാൻ അല്പം കൂടി ഊർജ്ജം ചെലവാക്കുമെങ്കിലും അതിന്റെ ഫലവും നാമമാത്രമാണ്.

ഭക്ഷണത്തിന് മുമ്പ് വെള്ളം കുടിക്കുന്നത് വയർ നിറഞ്ഞതായി തോന്നിപ്പിക്കുമെങ്കിലും അത് ദീർഘകാലത്തേക്ക് ഫലപ്രദമല്ല. 35 വയസ്സിന് മുകളിലുള്ളവർ ഭക്ഷണത്തിന് മുമ്പ് വെള്ളം കുടിക്കുന്നത് ഭാരം കുറയ്ക്കാൻ നേരിയ രീതിയിൽ സഹായിക്കുമെന്ന് പഠനങ്ങളുണ്ടെങ്കിലും, 21-35 പ്രായപരിധിയിലുള്ളവരിൽ ഈ മാറ്റം പ്രകടമല്ല.

വെള്ളം പെട്ടെന്ന് വയറ്റിൽ നിന്ന് ഒഴിഞ്ഞുപോവുന്നതിനാൽ അത് നൽകുന്ന വയർ നിറഞ്ഞ അനുഭൂതി അധികനേരം നിൽക്കില്ല. എന്നാൽ വെള്ളം നാരുകളടങ്ങിയ ഭക്ഷണവുമായി ചേരുമ്പോൾ കൂടുതൽ സമയം വിശപ്പിനെ നിയന്ത്രിക്കാൻ സാധിച്ചേക്കാം.

വെള്ളം കുടിക്കുന്നത് ആരോഗ്യത്തിന് അത്യാവശ്യമാണെങ്കിലും, ഭക്ഷണക്രമത്തിലും ജീവിതശൈലിയിലും മാറ്റം വരുത്താതെ വെള്ളം കുടിച്ചതുകൊണ്ട് മാത്രം അമിതഭാരം കുറയ്ക്കാനാവില്ല. കേവലം വെള്ളത്തിന് വിശപ്പിനെ ദീർഘനേരം തടഞ്ഞുനിർത്താനോ വലിയ അളവിൽ കലോറി കത്തിക്കാനോ കഴിയില്ലെന്ന് സാരം.