സോണിയാ ഗാന്ധി ആശുപത്രിയിൽ; മുഖ്യമന്ത്രി ചർച്ചകൾ നീളാൻ സാധ്യത
മുതിർന്ന കോൺഗ്രസ് നേതാവും രാജ്യസഭാ എംപിയുമായ സോണിയാ ഗാന്ധിയെ (79) ചെറിയൊരു ശസ്ത്രക്രിയക്കായി ഗുരുഗ്രാമിലെ സ്വകാര്യ ആശുപത്രിയിൽ പ്രവേശിപ്പിച്ചു. നേത്രസംബന്ധമായ ചികിത്സയുടെ ഭാഗമായാണ് ശസ്ത്രക്രിയയെന്നാണ് പ്രാഥമിക വിവരങ്ങൾ. എന്നാൽ ആശുപത്രി അധികൃതരോ പാർട്ടിയോ ശസ്ത്രക്രിയയെക്കുറിച്ചുള്ള കൂടുതൽ വിശദാംശങ്ങൾ ഇതുവരെ ഔദ്യോഗികമായി പുറത്തുവിട്ടിട്ടില്ല.
കേരളത്തിലെ മുഖ്യമന്ത്രിയെ നിശ്ചയിക്കുന്നതുമായി ബന്ധപ്പെട്ട് രാഹുൽ ഗാന്ധിയും മല്ലികാർജുൻ ഖാർഗെയുമായി സോണിയാ ഗാന്ധി ഇന്ന് കൂടിക്കാഴ്ച നടത്താനിരുന്നതാണ്. പുതിയ സാഹചര്യത്തിൽ ഈ നിർണ്ണായക ചർച്ചകൾ നീട്ടിവെച്ചേക്കും. കേരളത്തിലെ അനിശ്ചിതത്വം തുടരുന്നതിനിടെ സോണിയാ ഗാന്ധിയുടെ ആരോഗ്യനില സംബന്ധിച്ച വാർത്തകൾ പാർട്ടി പ്രവർത്തകർക്കിടയിൽ ആശങ്കയുണ്ടാക്കിയിട്ടുണ്ട്.
കഴിഞ്ഞ കുറച്ചു കാലങ്ങളായി വിവിധ ആരോഗ്യപ്രശ്നങ്ങൾ സോണിയാ ഗാന്ധിയെ അലട്ടുന്നുണ്ട്. ശ്വസനതടസ്സവും ആസ്തമയും കാരണം ഈ വർഷം ജനുവരിയിലും മാർച്ചിലും അവരെ ആശുപത്രിയിൽ പ്രവേശിപ്പിച്ചിരുന്നു. ഡൽഹിയിലെ കഠിനമായ തണുപ്പും മലിനീകരണവും അവരുടെ ആരോഗ്യത്തെ ബാധിച്ചിരുന്നതായി ഡോക്ടർമാർ നേരത്തെ വ്യക്തമാക്കിയിരുന്നു. 2025-ലും ഉദരസംബന്ധമായ അസുഖങ്ങളെത്തുടർന്ന് പലതവണ അവർ ചികിത്സ തേടിയിരുന്നു.
What's Your Reaction?
