വിമാനടിക്കറ്റ് നിരക്ക് കുതിക്കില്ല; ഇന്ധനവില പിടിച്ചുനിർത്താൻ ₹10,000 കോടി ഫണ്ട് പ്രഖ്യാപിച്ച് കേന്ദ്രം

ന്യൂഡൽഹി: വിമാന ഇന്ധനവിലയിലെ കുത്തനെ വർധന നിയന്ത്രിക്കാനും വിമാനക്കമ്പനികളുടെ പ്രവർത്തനം സുഗമമാക്കാനും ₹10,000 കോടി രൂപയുടെ പ്രത്യേക ഫണ്ടിന് കേന്ദ്ര സർക്കാർ അനുമതി നൽകി. പശ്ചിമേഷ്യൻ സംഘർഷത്തെ തുടർന്ന് വിമാന ഇന്ധനവില രണ്ടര ഇരട്ടിയിലേറെ ഉയർന്ന സാഹചര്യത്തിലാണ് നിർണായക തീരുമാനം.

2026 മാർച്ചിൽ ലീറ്ററിന് ₹60.5 ആയിരുന്ന വിമാന ഇന്ധനവില മേയിൽ ₹142 ആയി ഉയർന്നിരുന്നു. ഇതേത്തുടർന്ന് ആഭ്യന്തര സർവീസുകൾക്കായുള്ള ഇന്ധനവില ലീറ്ററിന് ₹75.6 എന്ന പരിധിയിൽ നിർത്താൻ കേന്ദ്രം നടപടി സ്വീകരിച്ചു.

വിമാനക്കമ്പനികളുടെ ആകെ പ്രവർത്തനച്ചെലവിന്റെ ഏകദേശം 40 ശതമാനവും ഇന്ധനത്തിനായാണ് ചെലവാകുന്നതെന്ന് കേന്ദ്രമന്ത്രി അശ്വിനി വൈഷ്ണവ് വ്യക്തമാക്കി. ഇന്ധനവില വർധന മൂലം പ്രവർത്തനം പ്രതിസന്ധിയിലാണെന്നും അടിയന്തര സർക്കാർ ഇടപെടൽ വേണമെന്നും എയർലൈൻ കമ്പനികൾ ആവശ്യപ്പെട്ടിരുന്നു.

പുതിയ ഫണ്ട് ഇന്ധനവില സ്ഥിരത ഉറപ്പാക്കുകയും വിമാന സർവീസുകൾ തടസ്സമില്ലാതെ തുടരാൻ സഹായിക്കുകയും ചെയ്യും. ആഗോള എണ്ണവില വർധനയുടെ ആഘാതത്തിൽ വിമാനടിക്കറ്റ് നിരക്ക് ഉയരുന്നത് നിയന്ത്രിക്കാനും ഇത് സഹായകരമാകുമെന്ന് മന്ത്രി പറഞ്ഞു.

വിമാനമേഖലയുമായി ബന്ധപ്പെട്ട 77 ലക്ഷം തൊഴിലുകൾ സംരക്ഷിക്കാനും ആഭ്യന്തര-അന്തർദേശീയ കണക്ടിവിറ്റി ശക്തിപ്പെടുത്താനും പദ്ധതി സഹായിക്കുമെന്നാണ് കേന്ദ്രത്തിന്റെ വിലയിരുത്തൽ.