വേഗരാജനായി എംജി വിൻഡ്സർ ഇവി: 400 ദിവസത്തിനുള്ളിൽ 50,000 യൂണിറ്റ് വിൽപ്പന

ജെഎസ്ഡബ്ല്യു എംജി മോട്ടോർ ഇന്ത്യയുടെ വിൻഡ്സർ ഇലക്ട്രിക് ക്രോസ്ഓവർ വിൽപ്പനയിൽ 50,000 യൂണിറ്റ് എന്ന സുപ്രധാന നാഴികക്കല്ല് പിന്നിട്ടു. വെറും 400 ദിവസങ്ങൾ കൊണ്ടാണ് ഈ നേട്ടം കൈവരിച്ചത്.

വിൽപനയ്ക്കെത്തിയതിനുശേഷം മണിക്കൂറിൽ ശരാശരി അഞ്ച് യൂണിറ്റുകൾ വിറ്റഴിച്ചുകൊണ്ട്, ഈ നേട്ടം കൈവരിച്ച ഇന്ത്യയിലെ ഏറ്റവും വേഗതയേറിയ ഫോർ വീലർ ഇവി ആണ് വിൻഡ്സർ എന്ന് കമ്പനി അവകാശപ്പെടുന്നു.

ശരാശരി, പ്രതിദിനം 125 ഉപഭോക്താക്കൾ വിൻഡ്സർ ഇവി വാങ്ങുന്നുണ്ട്. ഇത് രാജ്യത്ത് ഏറ്റവും വേഗത്തിൽ വിറ്റഴിക്കപ്പെടുന്ന ഫോർ വീലർ ഇവിയായി ഇതിനെ മാറ്റുന്നു.

എംജി അടുത്തിടെ വിൻഡ്സർ ഇവിയുടെ 'പ്രോ' (Pro) വേരിയൻ്റ് പുറത്തിറക്കിയിരുന്നു. 449 കിലോമീറ്റർ റേഞ്ചുള്ള 52.9 kWh LFP ബാറ്ററി പായ്ക്കാണ് ഇതിൻ്റെ പ്രധാന സവിശേഷത.

റേഞ്ച് വർദ്ധിച്ചിട്ടും കാറിൻ്റെ 136 എച്ച്പി പവർ ഔട്ട്പുട്ടും 200 എൻഎം ടോർക്കും മാറ്റമില്ലാതെ തുടരുന്നു. 7.4 kW എസി ചാർജർ ഉപയോഗിച്ച് ഏകദേശം 9.5 മണിക്കൂറിനുള്ളിൽ ബാറ്ററി പൂർണ്ണമായി ചാർജ് ചെയ്യാനാകും. എംജി വിൻഡ്സർ ഇവിയുടെ എക്സ്-ഷോറൂം വില 14 ലക്ഷം മുതൽ 18.39 ലക്ഷം രൂപ വരെയാണ്.