ശരിയായത് ചെയ്യുക’ എന്ന് മുദ്രാവാക്യം; ലോക്സഭയിൽ നന്ദി പ്രമേയം അവതരിപ്പിക്കാനായില്ല, പ്രധാനമന്ത്രിയുടെ സീറ്റ് വളഞ്ഞ് വനിതാ എംപിമാർ,

ന്യൂഡൽഹി:രാഷ്ട്രപതിയുടെ പ്രസംഗത്തിന് ശേഷമുള്ള നന്ദി പ്രമേയം അവതരിപ്പിക്കാൻ പ്രധാനമന്ത്രി നരേന്ദ്ര മോദിക്ക് സാധിക്കാതെ വന്നത് പ്രതിപക്ഷത്തെ വനിതാ എംപിമാരുടെ പ്രതിഷേധത്തെ തുടർന്ന്. കരസേന മുൻ മേധാവി  എം.എം.നരവനെയുടെ  ഓർമക്കുറിപ്പിലെ വരികൾ വായിക്കാൻ രാഹുൽ ഗാന്ധിക്ക് അനുമതി നിഷേധിച്ചതിനെത്തുടർന്ന് പ്രതിപക്ഷം ബഹളം വച്ചിരുന്നു.

ബുധനാഴ്ച പലതവണ നിർത്തിവക്കേണ്ടിവന്ന സഭ, വൈകുന്നേരം അഞ്ചിന് പ്രധാനമന്ത്രി സംസാരിക്കാനെത്തുന്നതിന് തൊട്ടുമുമ്പ് വീണ്ടും ചേർന്നെങ്കിലും, പ്രതിപക്ഷത്തെ വനിതാ എം.പി.മാരായ വർഷ ഗെയ്ക്‌വാദ്, ജ്യോതിമണി എന്നിവർ പ്രധാനമന്ത്രി ഉൾപ്പെടെയുള്ള ഭരണകക്ഷി അംഗങ്ങള്‍‌ കസേരയിലേക്ക് കയറുന്നത് തടയുകയായിരുന്നു. ‘ശരിയായത് ചെയ്യുക’ എന്നെഴുതിയ ബാനർ ഉയർത്തിപ്പിടിച്ചായിരുന്നു വനിതാ എംപിമാരുടെ പ്രതിഷേധം. കഴിഞ്ഞ ദിവസം എട്ട് പ്രതിപക്ഷ എംപി.മാരെ സ്പീക്കർ ലോക്സഭയിൽ നിന്ന് സസ്‌പെൻഡ് ചെയ്തതിൽ പ്രതിഷേധിച്ചായിരുന്നു വനിതാ എംപിമാരുടെ പ്രതിഷേധം. പിന്നാലെ സ്പീക്കറുടെ ചുമതലയുണ്ടായിരുന്ന സന്ധ്യ റായ് തുടർനടപടികൾ നിർത്തിവെച്ചു.