ചർമ്മത്തിന് തിളക്കമേകാൻ പർപ്പിൾ ഭക്ഷണങ്ങൾ; സൂര്യപ്രകാശത്തിൽ നിന്നുള്ള സംരക്ഷണത്തിന് മികച്ചതെന്ന് പഠനങ്ങൾ

പർപ്പിൾ നിറത്തിലുള്ള പഴങ്ങളും പച്ചക്കറികളും ആന്റിഓക്സിഡന്റുകളുടെ കലവറയാണ്. ഇവ ശരീരവീക്കം കുറയ്ക്കാനും ചർമ്മത്തിന്റെ ആരോഗ്യം മെച്ചപ്പെടുത്താനും സഹായിക്കുമെന്ന് പഠനങ്ങൾ വ്യക്തമാക്കുന്നു. 2019-ൽ 'ജേണൽ ഓഫ് ന്യൂട്രീഷൻ ആൻഡ് മെറ്റബോളിസം' പ്രസിദ്ധീകരിച്ച പഠനമനുസരിച്ച്, ഇവയിലടങ്ങിയിരിക്കുന്ന പോളിഫെനോൾസ് (Polyphenols) സൂര്യന്റെ അൾട്രാവയലറ്റ് വികിരണം മൂലമുണ്ടാകുന്ന കേടുപാടുകൾ തടയാനും ചർമ്മ അർബുദ സാധ്യത കുറയ്ക്കാനും സഹായിക്കുന്നു.

മുന്തിരി: അൾട്രാവയലറ്റ് രശ്മികളിൽ നിന്ന് ചർമ്മത്തെ സംരക്ഷിക്കുന്നു. 2021-ൽ അലബാമ സർവകലാശാല നടത്തിയ പഠനത്തിൽ, തുടർച്ചയായി മുന്തിരി കഴിക്കുന്നത് ചർമ്മത്തിന്റെ സ്വാഭാവിക സംരക്ഷണശേഷി ഏകദേശം 74.8% വർദ്ധിപ്പിക്കുമെന്ന് കണ്ടെത്തി.

ബീറ്റ്‌റൂട്ട്: രക്തയോട്ടം മെച്ചപ്പെടുത്താനും ചർമ്മത്തിന് സ്വാഭാവിക തിളക്കം നൽകാനും സഹായിക്കുന്നു. വീക്കം കുറയ്ക്കാനുള്ള ഇതിന്റെ കഴിവ് ചർമ്മത്തിന് കരുത്തേകുന്നു.

പാഷൻ ഫ്രൂട്ട്: ഇതിലടങ്ങിയിരിക്കുന്ന പൈസറ്റാനോൾ (Piceatannol) എന്ന ആന്റിഓക്‌സിഡൻ്റ് ചർമ്മകോശങ്ങളെ സൂര്യാഘാതത്തിൽ നിന്ന് സംരക്ഷിക്കുമെന്ന് 2013-ലെ ഒരു പഠനം വ്യക്തമാക്കുന്നു.

പർപ്പിൾ കാബേജ്: ആന്റി-ഇൻഫ്ലമേറ്ററി ഗുണങ്ങളാൽ സമ്പന്നമാണിത്. ഇതിന്റെ ഇലകൾ ചർമ്മത്തിൽ പുരട്ടുന്നത് വീക്കം കുറയ്ക്കാൻ സഹായിക്കുമെന്ന് പഠനങ്ങൾ പറയുന്നു.

വഴുതനങ്ങ: ചർമ്മത്തിന് അത്യാവശ്യമായ വിറ്റാമിൻ എ, സി എന്നിവയാൽ സമ്പന്നമാണ് വഴുതന. ഇതിലെ സോളാസോഡിൻ റാംനോസിൽ ഗ്ലൈക്കോസൈഡുകൾ (SRGs) ചർമ്മസംരക്ഷണത്തിന് ഏറെ ഗുണകരമാണ്.