ആരോഗ്യമുള്ള മുടിക്ക് ശരിയായ പരിചരണം; മുടിയുടെ ഘടനയറിഞ്ഞു വേണം ഷാംപൂവും എണ്ണയും തെരഞ്ഞെടുക്കാൻ

കൊച്ചി: എല്ലാവർക്കും ഒരേ ഷാംപൂവോ എണ്ണയോ ഫലപ്രദമാകണമെന്നില്ല. ഓരോരുത്തരുടെയും മുടിയുടെ ഘടനയും പ്രകൃതവും തിരിച്ചറിഞ്ഞു വേണം മുടി പരിചരണം തിരഞ്ഞെടുക്കാൻ. ആരോഗ്യകരമായ മുടിക്ക് അനുയോജ്യമായ രീതികൾ താഴെ പറയുന്നവയാണ്.

ശിരോചർമ്മത്തിലെ സെബം ഉൽപ്പാദനത്തിന് അനുസരിച്ചാണ് മുടിയുടെ സ്വഭാവം മാറുന്നത്. ഓരോ വിഭാഗത്തിനും അനുയോജ്യമായ പരിചരണ രീതികൾ നോക്കാം.

1. എണ്ണമയമുള്ള മുടി 
ശിരോചർമ്മത്തിൽ അമിതമായി സെബം ഉൽപ്പാദിപ്പിക്കുന്നത് മൂലമാണ് മുടിയിൽ എണ്ണമയം കൂടുന്നത്. ഇത് അഴുക്കും താരനും അടിഞ്ഞുകൂടാൻ കാരണമാകും.

കഴുകുന്ന രീതി: ആഴ്ചയിൽ മൂന്നോ നാലോ തവണ വീര്യം കുറഞ്ഞ ഷാംപൂ ഉപയോഗിച്ച് കഴുകുക. ഇത് അധിക എണ്ണമയം നീക്കാൻ സഹായിക്കും.

കണ്ടീഷണിങ്: കണ്ടീഷണർ തലയോട്ടിയിൽ തേക്കരുത്. മുടിയിഴകളിൽ (Hair strands) മാത്രം ഉപയോഗിക്കുക.

2. വരണ്ട മുടി 
ആവശ്യത്തിന് സെബം ഇല്ലാതിരിക്കുമ്പോഴോ ക്യൂട്ടിക്കിൾ കേടുവരുമ്പോഴോ ആണ് മുടി വരണ്ടുപോകുന്നത്. ഇത് മുടി പൊട്ടിപ്പോകാനും താരൻ വർദ്ധിക്കാനും കാരണമാകും.

കഴുകുന്ന രീതി: ആഴ്ചയിൽ ഒന്നോ രണ്ടോ തവണ മാത്രം ഷാംപൂ ചെയ്യുക. സൾഫേറ്റ് ഇല്ലാത്ത ഷാംപൂ തിരഞ്ഞെടുക്കുന്നത് ഈർപ്പം നിലനിർത്താൻ സഹായിക്കും.

കണ്ടീഷണിങ്: നിർബന്ധമായും കണ്ടീഷണർ ഉപയോഗിക്കണം. ആഴ്ചയിലൊരിക്കൽ ഡീപ്പ് കണ്ടീഷണിങ് ചെയ്യുന്നത് തിളക്കം നൽകും. കുളിക്കുന്നതിന് മുമ്പ് ചെറുചൂടുള്ള വെളിച്ചെണ്ണയോ ഒലിവ് ഓയിലോ തേക്കുന്നത് ഉത്തമമാണ്.

3. സാധാരണ മുടി 
എണ്ണമയവും വരൾച്ചയും കൃത്യമായ അളവിലുള്ള മുടിയാണിത്.

പരിചരണം: സ്വാഭാവിക ഘടന നിലനിർത്താൻ മിതമായ ഷാംപൂവും കണ്ടീഷണറും ഉപയോഗിക്കുക. അമിതമായ കെമിക്കൽ പരീക്ഷണങ്ങളും ഹീറ്റ് സ്റ്റൈലിങ്ങും ഒഴിവാക്കുന്നത് ആരോഗ്യത്തിന് നല്ലതാണ്.

ഹെയർ മാസ്കുകളുടെ പ്രാധാന്യം:

കണ്ടീഷണറുകൾ മുടിയുടെ പുറംഭാഗം മാത്രം സോഫ്റ്റ് ആക്കുമ്പോൾ, ഹെയർ മാസ്കുകൾ ശിരോചർമ്മത്തിനുള്ളിലെ കേടുപാടുകൾ പരിഹരിക്കാൻ സഹായിക്കുന്നു. ആഴത്തിൽ പോഷകങ്ങൾ നൽകുന്ന ഒരു ട്രീറ്റ്‌മെന്റാണിത്. എന്നാൽ മുടിയുടെ സ്വഭാവം നോക്കി മാത്രമേ ഹെയർ മാസ്കുകൾ തിരഞ്ഞെടുക്കാവൂ.