ചരിത്രനേട്ടം കുറിച്ച് ജസ്പ്രിത് ബുംറ: മൂന്ന് ഫോർമാറ്റുകളിലും 100 വിക്കറ്റ് തികയ്ക്കുന്ന ആദ്യ ഇന്ത്യൻ താരം

കട്ടക്ക്: ഇന്ത്യൻ സ്റ്റാർ പേസർ ജസ്പ്രിത് ബുംറ ടി20 ക്രിക്കറ്റിൽ ഒരു പുതിയ നാഴികക്കല്ല് താണ്ടി. ടെസ്റ്റ്, ഏകദിന, ടി20 ഫോർമാറ്റുകളിൽ 100-ഉം അതിലധികവും വിക്കറ്റുകൾ വീഴ്ത്തുന്ന ആദ്യ ഇന്ത്യൻ താരമായി ഇതോടെ ബുംറ ചരിത്രമെഴുതി. ദക്ഷിണാഫ്രിക്കയ്‌ക്കെതിരായ ഒന്നാം ടി20 മത്സരത്തിൽ, 11-ാം ഓവറിൽ ഡെവാൾഡ് ബ്രെവിസിനെ പുറത്താക്കിയാണ് ബുംറ ടി20യിലെ 100 വിക്കറ്റ് നേട്ടം പൂർത്തിയാക്കിയത്.

അന്താരാഷ്ട്ര ടി20യിൽ 100 വിക്കറ്റ് തികയ്ക്കുന്ന രണ്ടാമത്തെ ഇന്ത്യൻ താരമാണ് ബുംറ. ഈ വർഷം ആദ്യം അർഷ്ദീപ് സിംഗ് ഈ നേട്ടം കൈവരിച്ചിരുന്നു. മത്സരത്തിൽ 2 വിക്കറ്റുകൾ നേടിയ ബുംറ, തൻ്റെ ആകെ ടി20 വിക്കറ്റ് നേട്ടം 101-ൽ എത്തിച്ചു. 81 മത്സരങ്ങളിൽ നിന്നാണ് അദ്ദേഹം 100 വിക്കറ്റുകൾ വീഴ്ത്തിയത്.

81 മത്സരങ്ങളില്‍ നിന്നാണ് 100 വിക്കറ്റുകള്‍. 7 റണ്‍സ് വഴങ്ങി 3 വിക്കറ്റുകള്‍ വീഴ്ത്തിയതാണ് മികച്ച പ്രകടനം. 52 ടെസ്റ്റില്‍ നിന്നു 234 വിക്കറ്റുകള്‍ ബുംറ വീഴ്ത്തിയിട്ടുണ്ട്. 89 ഏകദിനത്തില്‍ നിന്നു 149 വിക്കറ്റുകളും സ്വന്തമാക്കി.

ക്രിക്കറ്റ് ലോകത്ത് ഈ എലൈറ്റ് നേട്ടം കൈവരിക്കുന്ന അഞ്ചാമത്തെ താരമാണ് ജസ്പ്രിത് ബുംറ. ടിം സൗത്തി, ഷാകിബ് അൽ ഹസൻ, ലസിത് മലിംഗ, ഷഹീൻ ഷാ അഫ്രീദി എന്നിവരാണ് ബുംറയ്ക്ക് മുൻപ് മൂന്ന് ഫോർമാറ്റുകളിലും 100-ൽ അധികം വിക്കറ്റുകൾ വീഴ്ത്തിയ മറ്റ് താരങ്ങൾ.