പാനിക് അറ്റാക്കും ഉത്കണ്ഠയും തിരിച്ചറിയാം; മാനസികാരോഗ്യം തകരാറിലാകുമ്പോൾ നൽകേണ്ട പ്രാഥമിക ശുശ്രൂഷകൾ

ശാരീരികമായ മുറിവുകൾക്ക് നൽകുന്ന പ്രഥമശുശ്രൂഷയെക്കുറിച്ച് നമുക്കെല്ലാം അറിവുണ്ടാകും. എന്നാൽ പാനിക് അറ്റാക്ക് പോലുള്ള മാനസിക പ്രതിസന്ധികൾ ഒരാൾക്ക് അനുഭവപ്പെടുമ്പോൾ എന്തുചെയ്യണമെന്ന് പലർക്കും അറിയില്ല. പാനിക് അറ്റാക്കും ആങ്‌സൈറ്റി അറ്റാക്കും (Anxiety Attack) തമ്മിലുള്ള വ്യത്യാസം ആദ്യം മനസ്സിലാക്കേണ്ടതുണ്ട്.

പാനിക് അറ്റാക്ക് vs ഉത്കണ്ഠ (Anxiety)

ഉത്കണ്ഠ: ഭാവിയിൽ സംഭവിക്കാൻ പോകുന്ന കാര്യങ്ങളെക്കുറിച്ചുള്ള ആശങ്കയാണ് ഉത്കണ്ഠ. ഇത് ആറ് മാസം വരെ നീണ്ടുനിൽക്കാം.

പാനിക് അറ്റാക്ക്: വളരെ പെട്ടെന്നുണ്ടാകുന്ന തീവ്രമായ ഭയമാണ് പാനിക് അറ്റാക്ക്. ഇത് ഏതാനും മിനിറ്റുകൾ മുതൽ മണിക്കൂറുകൾ വരെ നീണ്ടുനിന്നേക്കാം. ഇതിന് വ്യക്തമായ കാരണങ്ങൾ (Triggers) ഉണ്ടാകണമെന്നില്ല.

പ്രധാന ലക്ഷണങ്ങൾ

ശ്വാസതടസ്സം, നെഞ്ചുവേദന, തലകറക്കം.

അമിതമായി വിയർക്കുകയോ വിറയ്ക്കുകയോ ചെയ്യുക.

ഓക്കാനം, ആശയക്കുഴപ്പം.

സംസാരിക്കാൻ ബുദ്ധിമുട്ട് അനുഭവപ്പെടുക.

പാനിക് അറ്റാക്ക് നേരിടുന്ന ഒരാളെ എങ്ങനെ സഹായിക്കാം?

ഒരു വ്യക്തി ഈ അവസ്ഥയിലൂടെ കടന്നുപോകുമ്പോൾ താഴെ പറയുന്ന കാര്യങ്ങൾ ശ്രദ്ധിക്കുക:

ചെയ്യേണ്ട കാര്യങ്ങൾ:

ശാന്തത പാലിക്കുക: സഹായിക്കാൻ ചെല്ലുന്ന വ്യക്തി ആദ്യം സ്വയം ശാന്തനാവുകയും സൗമ്യമായി സംസാരിക്കുകയും വേണം.

സുരക്ഷിത സ്ഥാനത്തേക്ക് മാറ്റുക: ആൾക്കൂട്ടത്തിൽ നിന്നും അനാവശ്യ ബഹളങ്ങളിൽ നിന്നും അവരെ മാറ്റി ശാന്തമായ ഒരിടത്തേക്ക് ഇരുത്തുക.

ശ്വസനം നിയന്ത്രിക്കാൻ സഹായിക്കുക: സാവധാനം ശ്വാസമെടുക്കാൻ അവരെ പ്രേരിപ്പിക്കുക. പേപ്പർ ബാഗിലേക്ക് ശ്വാസം വിടുന്നത് ഗുണകരമാണ്.

ആത്മവിശ്വാസം നൽകുക: അവർ സുരക്ഷിതരാണെന്നും ഈ അവസ്ഥ ഉടൻ മാറുമെന്നും മൃദുവായ സ്വരത്തിൽ ഉറപ്പുനൽകുക.

ചെയ്യാൻ പാടില്ലാത്തവ:

"ശാന്തനാകൂ", "വിശ്രമിക്കൂ" തുടങ്ങിയ ഉപദേശങ്ങൾ ആവർത്തിച്ച് നൽകുന്നത് ഒഴിവാക്കുക; ഇത് അവരെ കൂടുതൽ സമ്മർദ്ദത്തിലാക്കാം.

വ്യക്തിയെ കുലുക്കുകയോ ബഹളം വെച്ച് ആളുകളെ കൂട്ടുകയോ ചെയ്യരുത്.

മൊബൈലിൽ ചിത്രീകരിക്കരുത്: അവരുടെ സ്വകാര്യതയെ മാനിക്കുക. ചിത്രീകരിക്കുന്നത് സാഹചര്യം വഷളാക്കും.

പരിഭ്രാന്തി പ്രകടിപ്പിക്കാതിരിക്കുക.

മാനസികമായ ഇത്തരം അവസ്ഥകളെ ഗൗരവത്തോടെ കാണുകയും ആവശ്യമെങ്കിൽ വിദഗ്ധ ചികിത്സ തേടാൻ അവരെ പ്രേരിപ്പിക്കുകയും ചെയ്യുക.